Mallrat postare – Nga sot, zhdoganimi paraprak do të bëhet nga Posta Shqiptare

Posta Shqiptare do të kryejë zhdoganimin paraprak të të gjitha objekteve dhe mallrave postare që mbërrijnë nga jashtë vendit nisur nga dita e sotme. Bëhet fjalë për objekte dhe mallra me vlerë totale mbi 22 euro si dhe dhurata me vlerë mbi 44 euro deri në vlerën totale prej 1000 euro.

Sipas Postës Shqiptare, ky parapagim i detyrimit doganor do të bëhet nga Posta në mënyrë të tillë që porosia e ardhur nga jashtë të mos vonojë pranë autoriteteve doganore, por të vijohet në zyrën postare në qendrën e qytetit ku është adresuar objekti postar.

Klienti do të njoftohet me shkrim për t’u paraqitur për kryerjen e pagesës për detyrimin doganor dhe shërbimin financiar pas mbërritjes së objektit në zyrën postare në qendër të qytetit. Pas kësaj, mund të tërheqë në çast edhe objektin postar të mbërritur në emrin e tij.

Zyrat postare ku do të ofrohet ky shërbim për qytetin e Tiranës janë Zyra Nr. 2 pranë Shkollës Kristaq Rama në Komunën e Parisit dhe Zyra Postare 5/1‎ pranë ish Stacionit të Trenit.

Ndërsa, në rastet e ndalimit të objekteve për kontroll doganor ose kur konstatohen mallra të ndaluara, klientët mund të paraqiten pranë zyrës së Doganës (Filiali i Postës Qendra Tranzite).

Ky shërbim është bërë i mundur falë bashkëpunimit të Postës Shqiptare me Drejtorinë e Përgjithshme të Doganave.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.