Masat e reja të BQE  – I kërkon bankave më shumë kapital për kreditë e këqija

Banka Qendrore Europiane do ti kërkojë bankave të Eurozonës duke filluar nga viti që vjen, për të vendosur më shumë mbulim me kapital për kreditë e reja që klasifikohen me probleme, dhe mund të prezantojë gjithashtu masa shtesë për të trajtuar stokun gjigant të borxhit të keq te ky sektor.

Kreditë e këqija po rëndojnë bilancet e bankave dhe po frenojnë huadhënien, duke sjellë shqetësime për BQE, ndërkohë që rritja e dobët e kreditit minimizon efektin e stimujve që ofron nëpërmjet normave të ulëta të interesit.

Duke filluar nga data 1 Janar, bankat do të kenë një afat kohor prej rreth 2 vitesh që të vendosin fonde për të mbuluar 100% të kredive pa kolateral që klasifikohen me probleme dhe 7 vite për të mbuluar të gjithë borxhin e keq me kolateral,  shkruan institucioni në një propozim të ri.

“Përveç kësaj, deri në fund të tremujorit të parë 2018, mbikëqyrja e BQE do të paraqesë konsideratën e politikave të mëtejshme për të adresuar stokun ekzistues të kredive me probleme, përfshirë marrëveshje të përshtatshme tranzitore”, deklaron institucioni në Frankfurt.

Bankat mbajnë një shumë prej 1 trilionë euro të kredive të këqija, që janë “trashëguar” nga kriza e borxhit të Eurozonës, me huadhënësit në Itali, Greqi, Spanjë dhe Qipro që kanë nivelet më të larta.

Problemi i tyre qëndron se Europës i mungon një treg efektiv për kreditë me probleme, kështu që shitja e borxhit të keq do të rezultonte në humbje të mëdha, duke detyruar rritjen e kapitalit, një ushtrim i kushtueshëm duke parë vlerën e ulët ekonomike të disa prej tyre.

Provigjonet do të rritet gradualisht drejt nivelit 100% dhe provigjonimi në fazën fillesare të afatit kohor mund të jetë më i lartë nëse rregulloret kërkojnë mbrojtje më të madhe me kapital.

Për më tepër, bankat pritet të shpjegojnë çdo devijim nga udhëzimet drejt mbikëqyrësve dhe bazuar në këto, BQE do të vlerësojë nevojën e masave shtesë mbikëqyrëse”, shkruan institucioni.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.