Ministria e Jashtme njoftim për masat e vendosura nga Republika e Kosovës – Nga 3 Janari do të lejohen vetëm qytetarët e vaksinuar

Ministria për Evropën dhe Punët e Jashtme nëpërmjet një njoftimi zyrtar te pak diteve me pare ka informuar mbi masat e reja të vendosura nga Republika e Kosovës për hyrjet dhe daljet e qytetarëve.

Çdo person i cili hyn në Republikën e Kosovës duhet të posedojë një nga dëshmitë e mëposhtme:

Çertifikatën e vaksinimit të plotë (me dy doza) kundër COVID-19;

Çertifikatën e vaksinimit për vaksinimin me një dozë, jo më e vjetër se 4 javë, bashkë me testin RT-PCR negativ për COVID-19, jo më i vjetër se 48 orë;

Çertifikatën e vaksinimit për vaksinimin me një dozë bashkë me dëshminë se personi ka kaluar COVID-19 (test RT-PCR pozitiv i lëshuar jo më pak se 21 ditë dhe jo më shumë se 180 ditë).

Nga data 3 janar 2022, do të lejohen të hyjnë në Kosovë vetëm ata persona që janë të pajisur me çertifikatën e vaksinimit të plotë (me dy doza).

Shtetasve të Republikës së Kosovës, si dhe personave me leje qëndrimi të përkohshëm ose të përhershëm në Kosovë, të cilët nuk posedojnë ndonjë nga dëshmitë e përmendura më lart dhe kërkojnë të hyjnë në territorin e Republikës së Kosovës, iu jepet mundësia të vaksinohen nga ekipet mobile të vendosura në pikën kufitare ANP “Adem Jashari (për ata që hyjnë në rrugë ajrore), dhe në pikat kufitare në Vërmicë, Merdare, Dheu i Bardhë, Hani i Elezit (për ata që hyjnë në rrugë tokësore).

Nga kërkesa për të poseduar ndonjërën nga dëshmitë e shënuara më lart, përjashtohen:

-Personat të cilët hyjnë në Kosovë përmes aeroportit apo përmes pikave kufitare tokësore dhe largohen nga Kosova brenda tre 3 orësh përmes aeroportit ose pikave kufitare tokësore, me kusht që në hyrje të nënshkruaj deklaratën se do ta lëshojë Kosovën brenda tre 3 orësh;

-Personat, të cilët punojnë si transportues profesionist (shoferë), me kusht që të respektojnë protokollin për transport ndërkombëtarë për mbrojtje nga COVID-19;

-Shtetasit e Republikës së Kosovës që kanë dalë jashtë Kosovës në 12 orët e fundit;

-Qytetarët e huaj, të cilët kalojnë nëpër Kosovë përmes transportit të organizuar me autobus ose me linjë të rregullt ndërkombëtare, transit, me kusht që të nënshkruhet deklarata se do ta lëshojnë territorin e Kosovës brenda 5 orësh;

-Diplomatët e huaj, të akredituar në Kosovë;

-Personat nën moshën 12-vjeçare;

-Personat me dëshmi mjekësore që kanë kundërindikacione shkencërisht të vërtetuara për mosvaksinim.  Personat e tillë duhet të paraqesin testin RT-PCR negativ për COVID-19, jo më i vjetër se 48 orë.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.