Ministrja Denaj: Dialogu konstruktiv është kyç për zgjidhjen e problematikave në marrëdhëniet ekonomike mes vendeve anëtare të CEFTA
Ministrja e Financave dhe Ekonomisë, Anila Denaj organizoi konferencën “CEFTA- Kthimi i Sfidave në Mundësi”, në kuadër të përmbylljes së kryesimit të CEFTA-s për këtë vit nga Shqipëria.
Gjatë takimit, Denaj theksoi debatin konstruktiv si shumë të rëndësishëm, për të zgjidhur problematikat e lidhura me tregtinë rajonale, si qarkullimi i mallrave.
“Ky është dhe një moment reflektimi për ne dhe partnerët tanë ndërkombëtarë dhe rajonalë, si dhe është një moment për të vlerësuar se çfarë ka funksionuar dhe çfarë duhet të funksionojë më mirë në të ardhmen” u shpreh Ministrja Denaj.
Po ashtu, Ministrja e Financave tha se bashkëpunimi ndër- rajonal ka rezultuar i suksesshëm dhe me rritje.
“Sot, rreth 25% e tregtisë së CEFTA-s është tregtia ndër-rajonale dhe rreth 75% për pjesën tjetër të botës, kryesisht me BE-në. Në fund të vitit që lamë pas, shkëmbimet tregtare vetëm midis Shqipërisë dhe palëve të CEFTA-s tejkaluan vlerën e 750 milion euro, mbi 300 milionë Euro në importe dhe 400 milion Euro në eksporte. Trendi pozitiv i shkëmbimeve tregtare në vitet 2014-2018 ka pësuar një rritje të përvitshme mesatare në nivel prej 6%, ndërkohë që shifrat e 11 mujorit të 2019 reflektojnë potencial për tejkalimin e realizimit të viteve të shkuara” u shpreh Denaj.
Në këtë konferencë ishe e pranishme Drejtorja për Ballkanin Perëndimor në Komisionin Europian, Genoveva Ruiz Cavalera, përfaqësues të qeverive dhe përfaqësues nga dhomat e tregtisë dhe industrisë të vendeve anëtare të CEFTA-s, etj. Në 2020, CEFTA do të jetë nën kryesimin e Bosnjë Hercegovinës.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.