Monte dei Paschi, me fitim – Banka më e vjetër në botë merr nxitje nga ulja e kostove
Banka tregtare më e vjetër në botë, Monte dei Paschi di Siena, që u shpëtua nga shteti italian gjatë vitit të kaluar, është kthyer në fitim gjatë tremujorit të parë.
Fitimi neto i bankës rezultoi në 188 milionë euro, nxitur nga ulja e kostove dhe humbjet më të ulëta nga kreditë. Banka e Toskanës, e zotëruar në 68% nga Qeveria pas shpëtimit prej 8 miliardë euro, është parë si një kërcënim ndaj sistemit financiar të Italisë prej vitesh dhe ristrukturimi i institucionit është ndjekur me detaje nga tregjet financiarë.
Aksionet e bankës u rritën me 10% pas publikimit të rezultatit për tremujorin e parë, duke mbiperformuar të gjithë sektorin bankar në Itali. Banka publikoi një humbje prej 169 milionë euro në tremujorin e parë 2017 dhe e mbylli vitin në rënie me 3.5 miliardë euro. Aksionet e bankës, vënë nën presion nga shqetësimet e investitorëve se mund të kërkojë më shumë kapital, kanë humbur rreth 30% të vlerës deri në tani për vitin, ndërkohë që i gjithë sektori italian, ka shtuar 13%.
Të ardhurat e Monte dei Paschi ranë me 6% për tremujorin e parë të këtij viti. Megjithatë, krahasuar me fundin e 2017-ës, të ardhurat neto nga interesat u rritën me 1.6%, falë kostove më të ulëta të financimit. Të ardhurat nga tarifat dhe komisionet u rritën me 12%. Ulja e kostove, që banka nisi pas shpëtimit nga qeveria, solli rënien e shpenzimeve operuese me 12% me bazë tremujore dhe 9% nga viti i kaluar.
Provigjonet për humbjet nga kredia thuajse u përgjysmuan nga nisja e viti të kaluar, në 137 milionë euro. Banka lajmëroi përfundimin e shitjes së 24 miliardë dollarë në kredi të këqija dhe bëri të ditur se ka nisur një proces për të hequr 4.5 miliardë euro të tjera për këtë vit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.