Nafta zgjeron humbjet – Ndikon rritja e rezervave në SHBA javën e kaluar

Çmimet e naftës po qëndrojnë në rënie gjatë sesionit të sotëm, për shkak të rritjes së rezervave të naftës në SHBA. Megjithatë pritshmëritë për uljen e prodhimit nga Arabia Saudite gjatë marsit, rritja ekonomike dhe dollari i dobët kanë kufizuar humbjet.

Nafta Bruto amerikane po tregtohet në rreth 59 dollarë për fuçi, ndërsa nafta Brent e Londrës po tregtohet në rreth 62.6 dollarë për fuçi.

Ministri i Energjisë në Arabinë Saudite deklaroi se, prodhimi i kompanisë shtetërore, Saudi Aramco do të jetë rreth 100 mijë fuçi në ditë më i ulët, krahasuar me shkurtin, ndërsa eksportet do të mbahen poshtë 7 milionë fuçive në ditë.

Në një farë mënyrë, dobësimi i dollarit amerikan dhe rritja ekonomike globale po ofrojnë mbështetje për tregun e naftës. Por, pavarësisht kësaj, analistët paralajmërojnë se, tendenca do të vijojë të jetë në rënie, kryesisht për shkak të prodhimit të lartë në SHBA.

Instituti Amerikan i Naftës deklaroi se, rezervat e naftës bruto u rritën me 3.9 milionë fuçi, gjatë javës që u mbyll më 9 shkurt, në totalin e 422.4 milionë fuçive.

Prodhimi në SHBA është rritur me rreth 20%, që nga mesi i vitit 2016, në mbi 10 milionë fuçi në ditë, duke tejkaluar madje edhe Arabinë Saudite. Rritja e prodhimit nga SHBA nënkupton se tregu mund të përballet sërish me mbi furnizim.

Tregjet tashmë po reagojnë, me çmimet fizike që kanë regjistruar rënie në Detin e Veriut, Rusi, Shtetet e Bashkuara të Amerikës dhe në Lindjen e Mesme.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.