Ndërgjegjësohen tatimpaguesit/Të ardhurat në Janar-Shkurt tejkalojnë planin me 7.4%
Të ardhurat nga tatim – fitimi janë rritur vazhdimisht, duke tejkaluar kështu edhe planin.
Kështu vetëm në muajin Janar – Shkurt janë mbledhur 78.9 milion euro, gati 7.4 për qind më shumë të ardhura krahasuar në raport me planin.
Sipas raportit të Administratës Tatimore të Kosovës në muajin Janar – Shkurt të ardhurat janë rritur me 10.6 milion ose 15.5 për qind krahasuar me të njëjtën periudhë të një viti më parë.
Nga të ardhurat e njëhershme nga FKPK (Fondi i Kursimeve Pensionale të Kosovës) gjatë muajit Janar janë arkëtuar 9.9 milion euro.
Po ashtu, gjatë kësaj periudhe janë arkëtuar mbi 23.1 milion euro të ardhura për FKPK. Pra, gjithsej të ardhurat gjatë kësaj periudhe raportuese (Tatimet, FKPK dhe nga të hyrat e njëhershme nga FKPK) janë në vlerë prej mbi 111.9 milion euro.
Faktori kryesor i rritjes së të ardhurave sipas Tatimeve, është përmirësimi i shërbimeve ndaj tatimpaguesve dhe ndërgjegjësimi i tyre.
“Rezultat për rritjen e të ardhurave janë avancimi i shërbimeve ndaj tatimpaguesve, të cilat kanë lehtësuar në masë të madhe deklarimin dhe pagesën e tatimeve, si dhe kanë ngritur nivelin e përmbushjes vullnetare. Po ashtu, këtu rol të rëndësishme ka edhe pjesa e legjislacionit tatimor, përmes së cilit bëhen përpjekje të vazhdueshme që të krijohet një infrastrukturë e mirë ligjore”, thuhet në njoftimin e ATK.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.