Ndërlidhja, të 3-tët nga fundi në Europë – Shqipëria e 100-ta në botë, ndër 169 shtete, por me tarifat “kundër” globalizimin

Shqipëria ka bërë një progres mjaft të lehtë në Indeksin Global të Ndërlidhjes që për të 5-tin vit është publikuar nga gjigandi i dërgesave, DHL, që këtë vit mban titullin: Gjendja e globalizimit në një botë të brishtë.

Ky raport, që përmban edhe një klasifikim të 169 vendeve të ndryshme të botës është një analizë e detajuar e globalizimit, pasi mat flukset e kapitalit, tregtisë, informacionit dhe njerëzve.

Ndër këto 169 shtete, pavarësisht progresit me vetëm dy pozicione, Shqipëria renditet e 100-ta në botë. Në Europë, Shqipëria rezulton të jetë shteti i tretë me performancën më të keqe, më mirë vetëm se Bjellorusia dhe Bosnje Hercegovina.

Në rajon ndërkohë, të gjitha shtetet, me përjashtim të Bosnje Hercegovinës janë më mirë se ne në renditje. Pavarësisht kësaj, në harkun e 5 viteve të fundit progresi është i ndjeshëm, me 17 vende.

Sa i përket lëvizjes së informacionit dhe tregtisë, Shqipëria është e 64-ta në botë. Për lëvizjen e kapitalit nuk ka një klasifikim të përgjithshëm, ndërkohë që për njerëzit, Shqipëria renditet e 46-ta në botë.

Ndër nën-indikatorët, vendi ynë performancën më të mirë e regjistron në drejtim të flukseve hyrëse të investimeve të huaja direkte dhe në drejtim të hyrjeve të turistëve në vendin e 22-të dhe 27-të respektivisht.

Performancë të dobët ndërkohë shënon tregtia dalëse e mallrave. Gjithsesi, raporti, në pjesën referuar politikave të globalizimit thotë qarët se në një drejtim, Shqipëria është ndër të fundit në botë. Ky drejtim është as më shumë e as më pak se tarifat, që na rendisin në vendin e 154-tët në botë, ndër 161 shtete të botës.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.