“Nuk ka më negociata për Brexit” – KE: Zgjedhja e kryeministrit nuk do ndryshojë kushtet e marrëveshjes

Kushtet e marrëveshjes së Brexit nuk do të ndryshojnë, pavarësisht zgjedhjes së një kryeministri të ri në Mbretërinë e Bashkuar, sipas një zëdhënësi të Komisionit Europian.  Ish-sekretari i Jashtëm Boris Johnson, që është kandidati kryesor për të zëvendësuar Theresa May,  ka kërcënuar së fundmi se nëse Bashkimi Europian nuk bie dakord për të ofruar kushte më të mira për Britaninë, ai nuk do të paguajë taksën e divorcit prej 39 miliardë paund.

Boris ka thënë se paraja është mënyra më e mirë për të negociuar një marrëveshje. Në lidhje me komentet e Boris Johnson, zëdhënësi i Komisionit,  Margaritis Schinas,  theksoi se Bashkimi Europian, nuk do të rinisë negociatat me Mbretërinë e Bashkuar për Brexit.  “Marrëveshja aktuale është negociuar nga komisioni dhe është miratuar nga të gjithë vendet anëtare. Kryeministri i ri nuk do të ndryshojë asgjë”, tha ai. Ndërkohë, edhe politikanët francezë dhe gjermanë kanë thënë se nuk do të ketë më bisedime mbi Brexit.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.