Pagesë me këste e detyrimeve – Udhëzimi: Rastet kur nuk lejohet, penalizimet për subjektet
Ministria e Financave ka nxjerrë një udhëzim të posaçëm që përcakton rastet kur një tatimpagues nuk mund të lidhë marrëveshje me administratën tatimore për pagesën me këste të detyrimeve.
Sipas udhëzimit i cili është botuar në Fletoren Zyrtare, marrëveshja për pagesë me këste mund të lidhet për detyrime tatimore të vendosura nga administrata tatimore si rezultat i një vlerësimi tatimor të kryer, si dhe për detyrime tatimore të vetëdeklaruara (vetëvlerësimit) nga tatimpaguesi. Por në këtë rast ka dy përjashtime kryesore, që nuk lejohet pagesa me këste.
Sipas udhëzimit, “administrata tatimore nuk hyn në një marrëveshje të pagesës me këste, vetëm për detyrim tatimor mbi të ardhurat të mbajtur në burim dhe të vetëdeklaruar nga tatimpaguesi, si dhe për detyrim nga kontributet e sigurimeve shoqërore dhe shëndetësore, i cili është llogaritur, ose mbledhur, ose mbajtur prej tatimpaguesit.
Ndërsa në të gjitha rastet e tjera, subjektet mund të paguajnë borxhet e akumuluara për shkak të situatave financiare në kompanitë e tyre, me këste. Përjashtim bëjnë institucionet apo ente shtetërore apo publike, qendrore apo vendore apo ente të tjera ku shteti është palë, për raste të një interesi të lartë publik ose të nevojës për moslejimin e cenimit të rendit dhe të sigurisë kombëtare, ku mund të lidhet një marrëveshje me këste edhe për detyrimet e kontributeve të sigurimeve shoqërore dhe shëndetësore.
Në këtë pikë duhet përmendur një sërë institucionesh shtetërore nuk kanë derdhur kontributet e punonjësve. Megjithatë kjo marrëveshje nuk shmang penalitete që parashikon ligji për subjektet që nuk paguajnë në kohë detyrimet.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.