Pandemia që “rrëzoi” ideologjitë! Studimi i “Scan Intelligence Unit”, e majta apo e djathta, kush po e menaxhon më mirë pandeminë?
Pandemia ka qenë gjatë këtyre muajve dhe padiskutim që do të jetë përgjatë të gjithë jetëgjatësisë së saj, një gur beteje elektorale. Qeveritë do të marrin kostot apo meritat e menaxhimit të saj dhe opozitat do të kërkojnë të ngjiten në pushtet nëpërmjet shifrave të infektimeve apo situatës në tërësi.
Në teori, qeveritë e majta janë më pak të “ndjeshme” ndaj lirive individuale apo atyre kolektive, ndërsa qeveritë që drejtohen nga ideologji të djathta, i trumbetojnë si të “shenjta” këto liri. Pandemia ka rezultuar të jetë “testi” i vërtetë për idelogjitë, pra kush do të guxonte dhe kush jo, të sakrifikonte liritë individuale dhe kolektive për hir të shëndetit dhe jetës së qytetarëve. Shembuj të ndryshëm nëpër Europë nuk vërtetojnë asnjë lidhje mes të dyjave.
Pra, vende goxha të djathta si Zvicra u treguan liberale në valën e parë të pandemisë, duke refuzuar mbylljen, dhe të njëjtën gjë bënë edhe vende bindshëm të Majta, si Suedia. Një vend i djathtë si Austria, ndërkohë, aktualisht është në një prej “lockdown” më të egër në Europë. Pra, me pandeminë, ideologjia, “ra”. Ky është perceptimi i parë, pa i hyrë shumë shifrave, me të cilat do të merremi më poshtë, për të vërtetuar pikërisht këtë pohim, pra, që nuk ka asnjë korrelacion të drejtpërdrejtë mes ideologjisë dhe menaxhimit të pandemisë.
Shifrat “flasin” vetë
Çfarë thonë shifrat? A ka një korrelacion të tillë? “Scan Intelligence Unit” ka bërë një studim unik në llojin e tij, për të arritur në një përfundim konkret, duke analizuar të gjitha vendet e Europës sipas numrit të rasteve me infektim për 1 milion banorë dhe krahut politik, majtas, qendër/koalicion i gjerë apo djathtas. Numri i rasteve për 1 milion banorë është marrë në konsideratë si indikatori më i saktë për të treguar menaxhimin e krizës.
Kemi analizuar vetëm të dhënat e kontinentit të vjetër, duke qenë se Europa për muaj me radhë ka qenë epiqendra e pandemisë dhe për faktin se në kontinent mbizotëron demokracia, çka e bën më pak të ngatërrueshëm edhe konceptin e ideologjive, por mbi të gjitha sepse vendet e Europës, duke qenë edhe më demokratike, reflektojnë më shumë besim për vërtetësinë në raportimin e të dhënave. Sipas të dhënave të përpunuara, rezulton se, nuk ka asnjë lidhje mes krahut politik dhe menaxhimit të krizës.
Mesatarja europiane e shteteve të drejtuara nga qeveri të majta flet për rreth 17.800 raste për 1 milion banorë (deri më 10 nëntor të 2020-ës), ndërsa mesatarja e vendeve të djathta, është lehtë më e ulët, në rreth 17.200 raste për 1 milion banorë, çka tregon jo vetëm që qeveritë e majta dhe besimi i tyre se për hir të jetës së qytetarëve mund të “sakrifikohen” edhe lirtë individuale, nuk “pi ujë”, por edhe se të djathtët dhe besimi i tyre se liria është e “shenjtë”, kanë pasur një sukses disi më të lartë në menaxhimin e pandemisë.
Shtetet e qendrës apo ato ku qeveris një koalicion i përbërë, ndërkohë, kanë një mesatare bindshëm më të ulët, pavarësisht se mes tyre gjendet edhe Italia, një prej vendeve simbol të pandemisë. Si shtete të qendrës kemi klasifikuar vetëm tre të tilla në Europë: Ukrainën, Estoninë dhe Danimarkën, çka e bën shumë të vështirë të arrish në një përfundim të qartë duke qenë se kampioni mbetet mjaft i vogël.
Po të shohim kreun e renditjes, pra vendet me më shumë raste infektimi për 1 milion banorë, rezulton se ndër 10 të parat, 6 shtete janë të djathta dhe 4 të majta, ndërkohë që edhe kreun e listës e mban një vend me qeveri të djathtë, siç është Belgjika, e cila ndiqet nga dy shtete me qeverisje të majtë; Çekia dhe Mali i Zi. Grafiku më poshtë tregon me detaje secilin shtet të Europës (me përjashtim të shteteve me popullsi mjaft të vogël, si Monako, Andora, Lichtenstein, San Marino, Vatikan, Gjibraltar, Ishujt Faroe, Isle of Man) sipas krahut politik dhe rasteve me Covid-19 për 1 milion banorë. Vija në mes tregon një tendencë thuajse të papërfillshme të rënies së rasteve të infektimit kur qeverisja është e djathtë.
Pra, edhe perceptimi i përgjithshëm, por edhe shifrat, tregojnë se, pandemia nuk njeh ideologji, majtas apo djathtas. Menaxhimi i krizës, asaj shëndetësore, ka qenë thuajse i njëjtë në të dyja kahet, thonë faktet. Ndoshta diferenca mund të vihet re në ekonomi, pra menaxhimin e krizës ekonomike të shkaktuar nga pandemia. Por, për të arritur në një përfundim më të saktë në lidhje me këtë, do të duhet të kalojë ende kohë, duke qenë se rimëkëmbja duket të jetë ende shumë larg, për sa kohë që virusi vijon të qarkullojë me ritme të shpejta, dhe për aq kohë sa të majtë e të djathtë vijojnë të shohin “karantinën” si metodën më të suksesshme për të ruajtur jetët e qytetarëve.
SCAN INTELLIGENCE UNIT/SCAN Magazine
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.