Paralajmëron Banka e Anglisë – “Paundi ndjek Brexit. Do të bjerë ndjeshëm nëse nuk ka marrëveshje”
Zv/Guvernatori i Bankës së Anglisë, Jon Cunliffe, tha se paundi mund të pësojë një rënie të madhe nëse Britania del nga Bashkimi Europian pa marrëveshje.
Sipas tij, valuta po nxitet nga negociatat me Europën dhe vlera aktuale reflekton shumë rezultate të mundshme. Kjo nënkupton se priten luhatje të mëdha ndërkohë që rezultatet bëhen të ditura. “Ndërkohë që rrugëtimi i Brexit bëhet i dukshëm dhe i qartë, kursi i këmbimit do të pësojë lëvizje të mëdha”-tha ai. Bisedimet ditën e Mërkurë dështuan të sjellin një dakordësi në Bruksel dhe Kryeministrja Theresa May po konsideron zgjatjen e periudhës së tranzicionit pas daljes në muajin Mars.
Liderët e Bashkimit Europian kanë deklaruar se nuk është bërë progres i mjaftueshëm deri më tani, në mënyrë që të arrihet marrëveshja e divorcit në nëntor. Ndërkohë që zv/guvernatori përsëriti se Banka e Anglisë nuk shënjestron kursin e këmbimit, ai tha se vlera e paundit ka shumë ndikime nga objektivi i arritjes së inflacionit në 2%.
Paundi ka ndjekur zhvillimet e Brexit që prej referendumit të vitit 2016 dhe pati rënien më të madhe pas rezultatit të atij votimi. Zhvlerësimi rriti çmimet e importit dhe fryu inflacionin për një periudhë thuajse 2-vjeçare. Aktualisht, valuta është në rënie me 12% që prej Qershorit 2016, ku britanikët votuan për të dalë nga Europa.
Klevis Llaha /SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.