Përfitueshmëria e bankave – Bie lehtë gjatë muajit prill

Përfitueshmëria e sistemit bankar ka rënë lehtë gjatë muajit prill. Sipas të dhënave nga Banka e Shqipërisë, treguesi i kthimit nga kapitali, që mat fitimin ndaj kapitalit aksioner të bankës për prillin ra në 15.4%, nga 16.6% që kishte qenë në muajin mars. E njëjta gjë ndodhi me kthimin nga aktivet, që zbriti në 1.5%, nga 1.6% që kishte qenë një muaj më parë.

Fitimet e sistemit bankar sidoqoftë ngelen në nivele më të kënaqshme krahasuar me të njëjtën periudhë të një viti më parë, kur si kthimi nga kapitali, ashtu edhe kthimi nga aktivet ishin në më pak se një të tretën e rezultateve të këtij viti.

Përfitueshmëria ka rënë pavarësisht nga ulja e nivelit të kredive me probleme, që në prill zbritën në 16.6%, niveli më i ulët që prej vitit 2011. Megjithatë, ulja graduale e nivelit të kredive me probleme ka pasur një efekt pozitiv në përfitueshmërinë e sistemit bankar në muajt e fundit, efekt që pritet të shtrihet edhe më tej gjatë këtij viti.

Gjendja e kapitalizimit dhe likuiditetit ngelet gjithashtu në nivele të lartë. Raporti i mjaftueshmërisë së kapitalit, sipas të dhënave më të fundit është 15.8%, nga niveli minimal i kërkuar prej 12%.

Ndërsa treguesi i likuiditetit, që mat raportin mes aktiveve dhe detyrimeve me maturim deri në një vit është 39.8%, afro dy herë më shumë se niveli minimal prej 20% që kërkon rregullorja e Bankës së Shqipërisë.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.