Përurohet rruga “Danish Jukniu”, Veliaj: Mbajtëm premtimin. Do investojmë dhe në periferi
Transformohet rruga “Danish Jukniu” në Njësinë 2 në kryeqytet. Pas investimit të kryer tashmë banorëve u ofrohet një rrugë e re me trotuare, ndriçim LED dhe infrastrukturë nëntokësore. Në inagurimin e kësaj rruge, kreu i bashkisë Erion Veliaj u kërkoi banorëve të mirëmbajnë investimet.
Ai tha se viti i katërt i mandatit në krye të Bashkisë së Tiranës do t’i kushtohet kryesisht periferive të Tiranës, në mënyrë që zonat tërësisht informale të urbanizohen dhe banorët të ndjejnë se janë qytetarë të Tiranës.
Kryebashkiaku tha se aktualisht në Tiranë janë hapur rreth 100 kantiere pune, duke përfshirë rrugë, blloqe banimi, investime në ujësjellës.
Veliaj informoi se krahas investimeve në infrastrukturën urbane, bashkia po vijon punën edhe sa i përket infrastrukturës arsimore. Ai tha se këtë vit do të hapet edhe shkolla e re “Kosova”, e cila do të krijojë mundësi që shkollat përreth të ulin numrin e nxënësve nëpër klasa.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.