Plani qeveritar në Itali – Dyshja populiste përgatitet për pushtet, jep premtime të kushtueshme

Dyshja populiste në Itali thuajse ka përfunduar një plan qeveritar, që përfshin një taksë të sheshtë në rreth 15%, të ardhura të garantuara për të varfrit dhe një moshë më të ulët të daljes në pension.

Premtimet elektorale mbi planin e shpenzimeve dhe atë tatimor, kanë shtuar shqetësimet e investitorëve se një administratë populiste mund të rrezikojë financat shtetërore dhe ekonominë e tretë më të madhe të Eurozonës, që ka rritjen më të ngadaltë në vendet që ndajnë monedhën e përbashkët.

Planet për të rikonsideruar traktatet me Europën, ka nxitur gjithashtu shqetësime se Italia mund të vështirësojë përpjekjet për reformat e Bashkimit Europian. Sipas një vlerësimi të Corriere della Sera, program ekonomik i partive kushton mes 65– 100 miliardë euro dhe se taksa e sheshtë është masa më e shtrenjtë.

Dy liderët, Luigi Di Maio dhe Matteo Salvini, nuk kanë bërë ende të ditur se kë do të nominojnë për Kryeministër.

Sipas ligjvënëses së Lëvizjes 5 Yjet, Laura Castelli, plani qeveritar do të përfshijë të ardhurat bazë për qytetarët që partia bëri thirrje gjatë fushatës dhe do të largojë premtimet e mëparshme për rritjen e moshës së daljes në pension.

Aleanca e qendrës së djathtë kryesoi ndaj Lëvizjes 5 Yjet në zgjedhjet e 4 Marsit, që dështuan të formojnë një qeveri dhe Salvini ka negociuar me Di Maio për më shumë se 2 muaj.

Politikat që po diskutohen deri më tani përfshijnë një taksë të sheshtë në 15% dhe në 20% për familjet që kanë të ardhura vjetore prej më shumë se 80,000 euro, sipas zyrtarëve të Ligës së Veriut.

Lëvizja 5 Yjet pret që të ardhurat bazë për qytetarët të kushtojnë rreth 17 miliardë euro në vit, por agjencia e pensioneve në Itali vlerëson se do të kushtojë në më shumë se 30 miliardë euro.

Planet për financimin nuk janë diskutuar ende. Italia ka borxhin e dytë më të madh në Eurozonë pas Greqisë. Programi i përbashkët përfshin gjithashtu përshpejtimin e ekspulsit për emigrantët e jashtëligjshëm.

Mbi politikat e jashtme, partitë synojnë një rishikim të traktateve të Bashkimit Europian dhe kundërshtojnë sanksionet kundër Rusisë.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.