Polonia vazhdon të refuzojë Euron

Banka Qendrore polake po mbështet gjithnjë e më shumë vullnetin e qeverisë  për të mbajtur vendin jashtë euros. Sot do të zhvillohet një konferencë, katër ditë para zgjedhjeve të Parlamentit Europian, hapja e të cilës do të realizohet nga guvernatori Adam Glapinski me fjalimin e titulluar ”Zloti polak do të thotë një ekonomi e fortë polake”. Nuk është hera e parë që ai ka folur për monedhën e përbashkët.  Por kjo është një tjetër mënyrë e ngjashme me kërkesën e qeverisë që partitë të angazhohen tek monedha vendase ‘zloti’ derisa prosperiteti të jetë në nivelin e Gjermanisë.

Ashtu si vendet e tjera ish komuniste që janë bashkuar me Bashkimin Europian që nga viti 2004, Polonia ka rënë dakord që përfundimisht të miratojë monedhën e përbashkët. Pesë shtete tashmë e kanë bërë, dhe vendet e fundit që do ta vënë në zbatim janë Bullgaria dhe Kroacia. Por Polonia, sikurse Hungaria dhe Republika Çeke, nuk po nxiton. Në të vërtetë, mbajtja e zlotit ndihmon në ruajtjen e ekonomisë së saj prej 526 miliardë dollarësh në të gjithë krizën globale financiare, duke e kthyer Poloninë në të vetmin anëtar të BE-së që ka mundur ta menaxhojë këtë krizë.

“Ne do të humbasim në një mënyrë apo në një tjetër“, nëse Polonia do të miratojë euron, tha udhëheqësi i partisë qeverisëse Jaroslaw Kaczynski për një tubim muajin e kaluar. “Ne i themi jo euros dhe jo çmimeve europiane,- ne duam paga europiane dhe ne jemi të mbështetur nga shumica e polakëve”.

Glapinski tha në fund të vitit të kaluar se adoptimi i euros do “kufizonte rrënjësisht” sovranitetin ekonomik të Polonisë, dëmtonte konkurrencën dhe frenonte rritjen ekonomike. Ai akuzoi “fanatikët e euros” për përfshirjen e tij në një skandal politik për të ndihmuar shtytjen e Polonisë në zonën e bllokut të monedhës kundër dëshirave të tij.

Për komisioneren e industrisë së BE Elzbieta Bienkowska, qëndrimi jashtë euros do të thotë se Polonia nuk ka zë në diskutimet e rëndësishme të politikave. Kjo mund ta lërë vendin ‘të shënjuar’ për breza, tha ajo.

Por pritja për barazi ekonomike me Gjermaninë do të marrë pak kohë. Produkti i brendshëm bruto për kokë banori është më shumë se dy të tretat e mesatares së BE-së, ndërsa Gjermania është rreth 25% më e pasur se ajo bazë. Bazuar në trajektoren e tyre aktuale të rritjes, Polonia do të arrijë nivelin e fqinjit të saj vetëm pas 110 vjet, sipas ish-bankierit qendror Jan Czekaj.

Burimi: Bloomberg

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.