Prodhimi i plastikës nga bimët – Kimisti holandez garon për çmimin e shpikësit të vitit

Shishe plastike të bazuara tek bimët, është kjo shpikja e shkencëtarit holandez, i cili garon këtë vit për çmimin europian të shpikësve.

Për vite të tëra, shishet dhe produkte të tjera plastike në industrinë ushqimore janë bërë nga një poliestër me bazë nafte të njohur si PET. Por, shpikja e Gert-Jan Gruter na ka dhënë një alternativë ekologjike që do të ndryshojë industrinë.

Gruter ka arritur të krijojë një proces kimik për të konvertuar sheqernat me bazë bimore në blloqe kimike ndërtuese të njohura si acide furandikarboksilike, që e lejojnë të krijojnë një poliestër më të mirë të njohur si PEF.

PEF ka shumë nga cilësitë e plastikës tradicionale: është e fortë, e formueshme dhe e riciklueshme, por ajo gjithashtu kërkon 70% më pak energji për t’u prodhuar. Mbi të gjitha ajo përbëhet nga bimët, jo nga nafta, çka eliminon çdo rrezik të mundshëm nga nxjerrja e materialit bazë.

Ashtu si PET, PEF mund të riciklohet plotësisht, madje edhe së bashku me PET, pa ndikuar në proces.

Polimeri me bazë bimore ka disa pluse të tjerë: më pak material është i nevojitur për të bërë shishe plastike me të njëjtën përmasë, është më rezistent dhe ofron më shumë mbrojtje për produktet ushqimore, në këtë rast pijet.

Tregu botëror i paketimit plastik vlen 54 miliardë euro, nga ku shishet plastike përllogariten midis 32-37 miliardë euro. Tregu parashikohet të vlejë 70 miliardë euro deri në vitin 2021, ndaj kompania Avantium që ndërmori studimin mbi PEF, do të ndërtojë një fabrikë në përmasa industriale në Antwerp, me një kapacitet vjetor prodhimi prej 50 mijë tonësh.

Shumë prodhues të pijeve kanë ranë tashmë dakord të përdorin këtë teknologji për të paketuar produktet e tyre, sapo ajo të vihet në dispozicion.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.