Protestë e tensionuar në Tiranë/ Dorëhiqet ministri i Brendshëm
Dorëheqja e ministrit të Brendshëm, protesta, përleshje, gaz lotsjellës e zjarrvënie. Ka qenë kjo panorama e pasdites në Tiranë, ku për të dytën ditë me radhë është protestuar për vrasjen e një të riu 25 vjecar nga forcat e rendit dy ditë më parë.
Dorëheqja e ministrit nuk i ka ndalur protestuesit të cilët janë përleshur me forcat e rendit, duke sjellë edhe përdorimin e gazit lotsjellës.
Ndërkohë, nuk kanë munguar as akte si thyerje xhamash apo djegie e koshave të plehrave, ashtu sikurse edhe shoqërimet e protestuesve të ndryshme në komisariate.
Dorëhiqet ministri i Brendshëm Sandër Lleshaj
Ministri i Brendshëm Sandër Lleshaj ka njoftuar përmes një deklaratë dorëheqjen e tij. Në deklaratën e dorëheqjes, Lleshaj shprehet se tani është moment për të mbyllur një kapitull angazhimi në krye të Ministrisë së Brendshme,
“Edhe sot jam përballë dilemës së fillimit, por në një kuptim tjetër. Nëse në fillim e pranova këtë post për të mos treguar dobësi, sot, në rrethanat e krijuara, dobësi do të ishte ngulmimi për të qëndruar.
Përgjatë më shumë se dy vjetëve në krye të Ministrisë së Brendshme, u përpoqa dhe arrita të ndryshoj për mirë shumë gjëra dhe e mbyll misionin tim me rekordet më të mira historike në fushën e rendit dhe të sigurisë publike në 30 vjetët e fundit të historisë së Shqipërisë.
U identifikova me vetëdije me çdo polic të Shqipërisë dhe i mbeta besnik këtij standardi. Edhe sot besoj se tek punonjësit e policisë qytetarët duhet të shohin Ministrin e Brendshëm, për sa kohë ministri pajtohet dhe pranon sjelljet apo qëndrimet e këtyre punonjësve.
Të gjitha gjërat që arrita të bëj në shërbim të konsolidimit të shtetit shqiptar janë hipoteka ime e rëndësishme që më bëjnë sot personalisht të ndihem mirë përpara qytetarëve shqiptarë dhe plot mirënjohje për kontributin e gjithë personelit të strukturave të Ministrisë së Brendshme dhe atë të bashkëpunëtorët e mi.
Në të njëjtën kohë, u përpoqa dhe arrita që të mos ta ndryshoj veten time. Mbeta ai që isha, me të njëjtën strehë familjare, me të njëjtën familje, me të njëjtët miq. Nuk mora asgjë nga posti, përveç pagës që ishte më e ulët se të ardhurat që kisha përpara se të bëhesha ministër, nuk bleva, nuk shita, nuk ndërtova, nuk……
Të gjitha këto gjëra që nuk bëra janë sot pasuria ime e pafundme që më bën të ndihem i fortë si shkëmb, i pastër si dritë dhe jashtëzakonisht i qetë.
E di fort mirë se shumëkush nuk është dakord sot me këtë vendim. Por megjithatë dëshiroj t’i garantoj ata se vendimi im vjen pikërisht në respekt të tyre dhe aspak si reagim ndaj atyre që e shajnë, shëmtojnë, vjedhin apo e djegin këtë vend.
Vendimi im vjen si njeri e si prind që ndan modestisht dhimbjen me prindërit e femijët e familjes së Klodian Rashës,por edhe si shprehje mirënjohjeje e respekti për ata që më besuan, mbështetën, inkurajuan e që jane fatmirësisht shumica qytetare e Shqipërisë” shprehet Lleshaj në deklaratën e tij.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.