Pse kryeministri irlandez veçoi Shqipërinë dhe Gjeorgjinë në shqetësimet e tij mbi emigracionin?
Kryeministri Irlandez, Taoiseach Leo Varadkar veçoi Shqipërinë dhe Gjeorgjinë si dy nga vendet me më shumë azilkërkues në Irlandë. Taoiseach tha se ka pasur një rritje prej 60% të numrit të personave që kërkojnë të jetojnë atje këto vitet e fundit dhe se: “Ka shumë njerëz nga Gjeorgjia dhe Shqipëria që hyjnë me dokumente false dhe ky është shtytësi kryesor i rritjes së numrit të tyre ne vend. ”
Shifrat e publikuara nga Zyra e Mbrojtjes Ndërkombëtare, një degë e Shërbimit Irlandez të Natyralizimit dhe Emigracionit, tregojnë se janë kryer 3,762 aplikime për mbrojtje ndërkombëtare nga qeveria irlandeze deri në fund të shtatorit. Pothuajse një e katërta e tyre, 875, ishin nga qytetarë shqiptarë dhe 15%, ose 556 raste, nga Gjeorgjia.
Varadkar nuk nënvizoi ndonjë informacion të ri në komentet e tij publike, por ishte e dukshme që ai zgjodhi t’i jepte zë një çështjeje që ka të bëjë me Qeverinë muajt e fundit. Trendi i të ardhurve nga të ashtuquajturat “vende të sigurta”, të tilla si Shqipëria dhe Gjeorgjia, ka qenë i dukshëm prej disa kohësh tashmë si dhe ka qenë një tipar kryesor i shifrave të publikuara nga Departamenti i Drejtësisë.
Si futen njerëzit nga Shqipëria dhe Gjeorgjia në Irlandë?
Shqipërisë dhe Gjeorgjisë i është dhënë leja për të udhëtuar në dhe nga zona e Shengenit pa nevojën e një vize përkatësisht nga viti 2011 dhe 2017. Zona e Shengenit lejon që njerëzit të udhëtojnë brenda Bashkimit Europian pa kontrolle pasaportash. Kjo ka lejuar që shqiptarët dhe gjeorgjianët të shfrytëzojnë kufizimet e lehtësuara të zonës Shengen për të kaluar më pas në Irlandë.
Duke qenë se nuk ka fluturime të drejtpërdrejta midis Shqipërisë, Gjeorgjisë dhe Irlandës, por pika tranziti si Milano dhe Lanzarote, kuptohet që janë pikërisht këto vende që kanë shërbyer si katapultë për të emigruar më pas diku tjetër jashtë Shengenit, sigurisht me dokumente të falsifikuara në shumicën e rasteve.
Sipas burimeve zyrtare problemi kryesor qëndron në faktin se pjesa e madhe e emigrantëve që mbërrijnë në Irlandë kanë si synim përfundimtar të udhëtojnë për në Mbretërinë e Bashkuar duke përdorur Zonën e Përbashkët të Udhëtimit që ekziston mes dy vendeve fqinjë. Ndaj qëllimi dhe debati i momentit është pikërisht mirëmbajtja e kësaj zone për të evituar kështu shndërrimin e Irlandës në një portë të pasme të Britanisë për azilkërkuesit.
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.