Qeveria fushatë për azilantët – Ministria e Brendshme zbret në terren, kontrolli fillon nga “Nënë Tereza”
Qeveria ka zbritur në terren për të inspektuar dhe njohur më nga afër situatën në pikat kufitare, me fokus fenomenin e azilantëve. Zv/ministrja e Brendshme Rovena Voda vizitoi Policinë Kufitare në aeroportin ‘Nënë Tereza’ duke u njohur edhe me masat për parandalimin e fenomenit të azilkërkimit.
Vetëm gjatë muajit të fundit rezulton se, 177 shtetasve shqiptarë u është refuzuar udhëtimi në zonën Shengen, pasi nuk plotësonin kushtet. Zëvendësministrja foli jo vetëm për abuzim me të drejtën e lëvizjes por edhe për kosto shtesë që sjell ky abuzim, sidomos për qytetarët, por edhe për qeverinë.
‘’Jemi në aeroportin e Rinasit, një nga pikat kufitare në Republikën e Shqipërisë, ku janë lëvizjet më të mëdha të shtetasve shqiptarë, por edhe atyre të huaj. Kemi ardhur këtu për të shpërndarë disa postera dhe fletëpalosje me një mesazh shumë të qartë për të gjithë, për të mos abuzuar me të drejtën e lëvizjes së lirë. Mjafton të kujtojmë që vetëm brenda një muaji ne kemi patur 177 shtetas shqiptarë të kthyer, të cilët nuk kanë plotësuar kriteret e lëvizjes së lirë në vendet Shengen, sigurisht kosto edhe për këta qytetarë, por njëkohësisht edhe abuzim me të drejtën e lëvizjes së lirë. Por të jemi sa më të rregullt, sa më strikt dhe mjafton të rikujtojmë dhe një herë faktin që Shqipëria është një vend i origjinës së sigurt. Dhe sigurisht është një vend me shumë shanse dhe mundësi për të gjithë qytetarët shqiptarë’’.
Fushata e Ministrisë së Brendshme për sensibilizimin e qytetarëve do të vijojë në t të gjitha pikat kufitare. Të dhënat më të fundit të publikuara nga Eurostat ndërkohë flasin për një rritje të numrit të azilkërkërkuesve shqiptarë nëpër Europë gjatë tremujorit të dytë të vitit.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.