Regjistrimi i banesave të vjetra – Gjiknuri: Kemi përgatitur vendimin për reduktimin e tarifave
Qeveria po përgatit një vendim i cili parashikon masa lehtësuese në funksion të regjistrimit të banesave të vjetra. Lajmin e ka bërë të ditur ministri i Infrastrukturës dhe Energjisë, Damian Gjiknuri gjatë dëgjesës me banorët e Himarës në kuadër të turit të llogaridhënies publike të qeverise.
Sipas tij, vendimi i cili pritet të zbatohet së shpejti parashikon reduktimin e tarifave për regjistrimin e këtyre shtëpive që kanë mungesë dokumentacioni.
“Kemi përgatitur edhe një vendim për të reduktuar në minimum tarifat për regjistrimin e shtëpive të vjetra. Shumë shpejt kjo do të bëhet realitet sepse përtej problemeve të vjetra të pronësisë që janë të trashëguara edhe për shkak të mosmenaxhimit të tokës ka shumë shtëpi të vjetra të cilave u mungon dokumentacioni”, tha Gjiknuri.
Ndërkohë, duke u ndalur më tej te problematika e pronave, e cilësuar edhe si ndër më shqetësueset në këtë zonë, ministri shtoi se së shpejti do të bëhet hapja e zyrës së shërbimit të hipotekës në Himarë.
Lidhur me investimet që po kryhen në Himarë, Gjiknuri nënvizoi ndërhyrjen në fushën e ujësjellës-kanalizimeve, një projekt me vlerë mbi 40 milionë lekë.
“Edhe investimet që do të bëhen në ujësjellës kanalizim. Himara është përfituese e një prej projekteve më të mëdha që shkon mbi 40 milion euro e që do të rregullojë një pjesë të mirë të sistemit të ujësjellës-kanalizimeve në qytet janë si rezultat i vëmendjes së qeverisë në këtë zonë”, u shpreh Gjiknuri.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.