Rënia e emigrimit në Britani – Londra do të humbiste më shumë nga mungesa e punonjësve të BE
Ulja e emigrimit nga Bashkimi Europian drejt Mbretërisë së Bashkuar me 50%, do të dëmtonte rëndë Londrën. Kryeqyteti do të përballej me ndikimin më të madh, pasi ka pjesën më të madhe të punonjësve nga Zona Ekonomike Europiane, raporton PricewaterhouseCoopers.
Në lidhje me sektorët, përpunimi i ushqimeve, ndërtimi, hotelet dhe restorantet janë më të varurat ndaj punonjësve të Bashkimit Europian. Ndaj të ardhurave britanike, ndikimi i uljes së emigrimit me 50% nga Bashkimi Europian do të kishte efekt relativisht të vogël. PBB mesatar për frymë do të ishte 0.2% më i vogël deri në vitin 2030, ekuivalent me humbjen e 60 paund për person.
Rritja ekonomike do të ishte rreth 1% më e ulët, tregon raporti. Analiza është bazuar në projeksione të skenarëve të ndryshëm mbi popullsinë nga Zyra Kombëtare e Statistikave. Të dhënat e fundit tregojnë se migrimi neto në periudhën post-Brexit ka rënë në 164 mijë persona në vit nga 185 mijë, por zyra e Statistikave projekton se mund të bjerë poshtë 100 mijë.
Kryeministrja Theresa May ka premtuar se do të dalë nga tregu i përbashkët i Bashkimit Europian, duke sjellë ndërprerjen e lëvizjes së lirë të punëtorëve nga blloku drejt Britanisë. Londra ka dy herë më shumë punonjës nga Zona Ekonomike Europiane krahasuar me pjesën tjetër të vendit dhe industria e ndërtimit në kryeqytet do të goditej keq, tregon raporti i PWC.
Frenimi i rekrutimeve nga punonjësit me aftësi të larta nga Europa do të kishte ndikime negative edhe për produktivitetin. Sipas raportit, do të duhet një periudhë 10-vjeçare që trajnimi i britanikëve të mbushë hendekun.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.