Sa e aftë është Shqipëria të rrisë talente? Raporti global, ndër 5 vendet me performancën më të dobët në Europë

Shqipëria ka humbur një pozicion në indeksin global të talenteve 2020, që publikohet çdo vit në kuadër të punimeve të Forumit Ekonomik Botëror në Davos të Zvicrës.

Kështu, në raportin e këtij viti, Shqipëria renditet e 76-ta ndër 132 vende të ndryshme të botës, me 38.94 pikë, ndërkohë që një vit më parë mbante pozicionin e 75-të ndër 125 shtete, por me 37.35 pikë.

Kjo do të thotë se pikëzimi është përmirësuar krahasuar me një vit më parë Ky pozicionim e rendit vendin tonë ndër 5 performuesit më të dobët në Europë, më mirë vetëm se Moldavia, Turqia, Maqedonia e Veriut dhe Bosnje Hercegovina.

Në profilin e Shqipërisë ndërkohë, ndër nën-indikatorët, rezulton të ketë perforformancën më të dobët ai që i referohet aftësive dhe njohurive globale, që na pozicionon në vendin e 104-ët në botë, ndër 132 ekonomi.

Kriteri i dytë më negativ është ai i mundësimit, pra të krijimit të kushteve për talentet, ku në përgjithësi përfshihen politikat qeverisëse përfshirë edhe indikatorë si korrupsioni, ku renditemi të 81-tët në botë.

Ndër nën-indikatorët e tjerë alarmantë janë ata të dy që i referohen trurit, mbajtjes së trurit, pra të aftësisë për të mbajtur në vend individët e kualifikuar dhe me aftësi, por edhe përthithja e trurit, pra të individëve të aftë, të lindur jashtë Shqipërisë.

Sa i përket rritjes talenteve ndërkohë, Shqipëria renditet e 73-ta në botë. Në vend të parë në botë se shteti që i trajton më mirë talentet e veta ëhstë Zvicra dhe ndiqet nga Shtetet e Bashkuara të Amerikës dhe Singapori.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.