Sfidat që shqetësojnë BQE – “Borxhi i lartë publik, fitim i ulët i bankave dhe flluska e pronave”
Banka Qendrore Europiane bëri të ditur se janë shtuar rreziqet ndaj stabilitetit financiarë, duke theksuar cënueshmëri nga flluskat në pronat e paluajtshme e deri te borxhi i lartë qeveritar dhe Brexit. Rritja ekonomike në 19 vendet e Eurozonës është ngadalësuar bidnshëm në vitin e kaluar dhe lufta tregtare botërore mund të ndikojë humorin e biznesit.
“Sfidat ndaj stabilitetit financiar janë rritur për shkak të perspektivës ekonomike. Nëse rreziqet materializohen, kostot financiare për shtetet me probleme do të rriten, çka do të shtojë problemet me borxhin”, deklaroi institucioni në Frankfurt. Bashkimi Europian pritet të nisë procedurat e gjobitjes së Italisë javën e ardhshme, për thyerjen e rregullave fiskale. Banka Qendrore Europiane, pa përmendur Italinë, deklaroi se mungesa e disiplinës fiskale dhe vonesa reformave strukturore, mund të shtojnë presionet e borxhit.
Institucioni qendror bëri të ditur se bankat pritet të gjenerojnë një kthim nga kapitali (RoE) prej 6% në 2-3 vitet e fundit, ndërkohë që shumica e huadhënësve nuk do të fitojnë koston e kapitalit apo kthimet e pritura prej 8-10% nga investitorët. Fitimet e ulëta të bankave përbëjnë burim shqetësimi për institucionin, pasi nuk mund të transmetojë stimujt monetarë. Banka theksoi edhe mbivlerësimin e tregut të pronave. Ndërkohë që Eurozona është e mirë përgatitur për Brexit, dalja e Britanisë pa marrëveshje do të dëmtojë rritjen ekonomike dhe sjellë luhatje të mëdha në tregje.
Klevis Llaha/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.