Shefja e kompanisë së basteve bëhet njeriu më i paguar në Britani falë rrogës 199 milionë paund
Bashkëthemeluesja dhe shefja ekzekutive e kompanisë së basteve sportive Bet365, Denise Coates, e pagoi veten e saj vitin e shkuar me 199 milionë paund (223 milionë euro). Kjo e bën atë tashmë shefen më të paguar në Britani dhe shumë herë më të pasur se titullmbajtësi i mëparshëm, Martin Sorrell, shefi i WPP, i cili vitin e shkuar fitoi vetëm 48.1 milionë paund.
Coates ia lejoi këtë pagë vetes pasi kompania shënoi 525 milionë paund fitime për vitin fiskal 2016/2017. Nga rroga 199 milionëshe, Coates mblodhi 18 milionë paund në formën e pagesave të dividentit, pra fitimeve që korporata ua shpërndan aksionerëve.
Miliarderja 50-vjeçare e nisi karrierën e saj si arkëtare në një nga pikat e basteve të babait të saj. Shumë shpejt, në moshën 22-vjeçare ajo u bë menaxherja e rrjetit të vogël në pronësi të familjes.
Duke parë popullaritetin në rritje të uebfaqeve të basteve, ajo vendosi të lançojë të sajin duke marrë një borxh prej 15 milionë paundësh nga biznesi familjar i basteve.
Nëna e pesë fëmijëve e nisi biznesin me vëllain e saj John Coates dhe ka mazhorancën e aksioneve në 50.01%. Sipas Forbes, pasuria e saj llogaritet në rreth 4 miliardë dollarë.
Bet365 u vendos në vitin 2000 në një parking në Stoke-on-Trent, ndërsa është bërë e njohur edhe për shkak të mazhorancës së aksioneve në klubin e futbollit Stoke City, i cili mban edhe reklamën e kompanisë.
Vitin e shkuar klientët e kompanisë vunë rreth 47 miliardë paund baste, 10 miliard më shumë se një vit më parë.
Për shkak të shifrave të larta të varësisë në Britani, 2 milionë njerëz, ka një presion të shtuar mbi industrinë sportive për të ulur influencën e vënies së basteve në futboll. Në një deklaratë të saj, zonja Coates tha se kompania “e njeh përgjegjësinë për të minimizuar dëmin e lidhur me kumarin dhe për të mbajtur krimin larg basteve”.
Ajo shtoi se vitin e kaluar dhuroi 50 milionë paund drejt fondacionit me emrin e saj, i cili mundëson fonde për organizata të ndryshme bamirësie.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.