Shërbimet, me dy “fytyra”. Kapërcejnë krizën në 2020, por turizmi i “zhytur” në humbje

Aktiviteti i shërbimeve është përmirësuar lehtë në tremujorin e fundit të vitit të kaluar, duke vijuar të qëndrojë në nivele më të larta se viti paraardhës. Kështu, indeksi i shitjeve neto në këtë sektor, shënoi rritje prej 3.2% në tremujorin e 4-t të vitit të kaluar, krahasuar me të njëjtën periudhë të vitit paraardhës. Rritje ka regjistruar edhe indeksi i fondit të pagave dhe ai i numrit të punonjësve. Por, ndërkohë që në tërësi situata duket se e ka përmbysur krizën e shkaktuar nga pandemia, po të shohim të dhënat sipas llojit të aktivitetit, vihet re një rënie drastike në aktivitetin e hoteleve, bareve dhe restoranteve, si dhe atë të agjencive turistike, tre komponentë që ilustrojnë mjaft mirë gjendjen e rëndë në të cilën vijon të ndodhet sektori turistik në vendin tonë. Së bashku me aktivitetin e transportit dhe magazinimit, këto janë aktivitetet e vetme që vijojnë të jenë ende në krizë, pra në rënie krahasuar me vitin 2019.

Agjencitë e udhëtimit, ku indeksi i shitjeve neto është në rënie me 66%, si dhe hotelet, në rënie me rreth 40%, janë aktivitetet më të goditura, sinjalizojnë shifrat zyrtare nga Instituti i statistikave. Më pas ndjekin baret dhe restorantet, me rreth 19% rënie të shitjeve neto. Në sektorin e shërbimeve, vetëm tregtia, informacioni dhe komunikacioni, si dhe aktivitetet arkitekturore dhe inxhinierike janë në zgjerim krahasuar me periudhën para krizës. Edhe sa i përket indeksit të fondit të pagave dhe numrit të punonjësve, agjencitë e udhëtimit, hotelet dhe baret-restorantet regjistrojnë një rënie të theksuar. Për hotelet, indeksi i numrit të të punësuarve regjistrohet në një rënie prej thuajse 30% krahasuar me vitin paraardhës, dhe me rreth 27% ai i fondit të pagave. Për baret dhe restorantet ndërkohë, rënia regjistrohet në rreth 18% në indeksin e numrit të të punësuarve dhe në rreth 17% në atë të fondit të pagave.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.