Shit-blerjet e energjisë/KESH “sukses të pjesshëm” nga optimizimi, shet 165 mijë euro energji
Pavarësisht se nxori në shitje 9440 Mwh energji, në procedurën e fundit të optimizmit Korporata Elektroenergjetike Shqiptare ka arritur të shesë vetëm një pjesë të saj e më konkretisht 2790 MWh, me një çmim mesatar prej 59.13 euro/MWh.
Nga realizimi i këtij transaksioni, KESH ka siguruar rreth 165 mijë euro të ardhura, por nga ana tjetër ka shpenzuar për blerje energjie rreth 38 mijë euro. Sipas rezultateve të publikuara nga ky dikaster procedura është mbyllur me sukses në drejtim të blerjes së sasisë së kërkuar, duke siguruar 1500 MWh, me një çmim mesatar prej 25.13 euro/MWh.
Kushtet jo të favorshme hidrike po detyrojnë Korporatën Elektroenergjetike Shqiptare të realizojë procedura të shit-blerjes së energjisë, duke synuar përfitimin nga diferenca e çmimit të shitjes me atë të blerjes.
Në procedurat e fundit të shit-blerjes të realizuar nga KESH janë blerë rreth 1 mln euro energji, ndërsa janë realizuar rreth 90 mijë euro të ardhura nga shitja e saj. Megjithatë, pak ditë më parë, Koorporata deklaroi se pavarësisht mungesës së reshjeve të shiut, situata në të gjithë kaskadën e lumit Drin është në kontroll dhe monitorim të vazhdueshëm, duke menaxhuar në mënyrë optimale prodhimin e energjisë.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.