Shitblerjet e bankave – ABI dhe Fibank në garë për blerjen e NBG
Autoriteti i Konkurrencës njoftoi të martën miratimin e blerjes së Veneto Banka nga Intesa Sanpaolo, ndërkohë që bisedimet për shitblerje në tregun bankar janë më aktive se kurrë në vitet e fundit.
Revista “Scan Magazine” në numrin e muajit shtator jep një informacion të zgjeruar lidhur me negociatat e shitblerjeve që po zhvillohen mes bankave. Në një fazë më të avancuar është shitja e filialit të NBG Bank në Shqipëri.
Grupi grek ka marrë vendimin për t’u larguar nga tregjet e rajonit dhe për forcuar aktivitetin e vet në Greqi. Pas shitjes së filialit në Rumani gjatë verës, besohet se shitja e radhës do të jetë banka në Shqipëri.
Dy bankat më të interesuara për blerjen e NBG Shqipëri janë Fibank dhe ABI Bank. Fibank ka shfaqur hapur ambicien për t’u rritur në tregun shqiptar, përmes blerjes së një banke tjetër.
Pasi hoqi dorë dy vjet më parë nga blerja e Credit Agricole Shqipëri, tashmë grupi bankar bullgar ka bërë një ofertë për blerjen e NBG Bank. Aktualisht, Fibank në Shqipëri është një bankë në rritje, por me pjesë tregu ende modeste, prej 1.35%.
Nëse arrin të blejë NBG, Fibank do të zotërojë rreth 4.2% të aktiveve totale të tregut. Pikërisht banka që bleu Credit Agricole, ABI Bank, është e interesuar për një zgjerim të mëtejshëm në tregun shqiptar dhe po negocion gjithashtu për të blerë filialin e NBG në Shqipëri.
Aktualisht, ABI Bank zotëron 2.7% të tregut, ndërsa me një blerje të mundshme të NBG do të arrinte në rreth 5.6% dhe do të bëhej banka e gjashtë më e madhe në Shqipëri. ABI Bank dhe Fibank i kanë paraqitur ofertat e tyre grupit bankar grek, që pritet të marrë një vendim së shpejti.
Të tjera banka që po kërkojnë në mënyrë aktive blerës janë Tirana Bank dhe Banka Ndërkombëtare Tregtare. Edhe Grupi i Pireut, njëlloj si NBG, ka vendosur të tërhiqet nga tregjet e rajonit dhe të forcojë aktivitetin bankar në Greqi.
Një vendim për t’u tërhequr nga biznesi bankar ka marrë edhe ICB Banking Group, grupi malajzian që kontrollon Bankën Ndërkombëtare Tregtare në Shqipëri.
Në vitin 2007, ky grup zotëronte 15 banka në Afrikë, Azi dhe në Europë, ndërsa aktualisht zotëron vetëm tre banka, në Shqipëri, Tanzani dhe Bangladesh.
Qëllimi është dalja e plotë nga biznesi bankar dhe për këtë arsye po kërkohen blerës edhe për bankat e mbetura, përfshi edhe atë në Shqipëri.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.