Shqipëria pjesë e nismës rajonale për financimin dhe buxhetimin e barazisë gjinore, ministrja Denaj: “Përmirësim i financave publike për ndaljen e pabarazisë”

UN Women dhe Sida(Agjencia Suedeze e Bashkëpunimit Ndërkombëtar për Zhvillim) prezantuan nismën e re rajonale katër vjeçare në mbështetje të qeverive të Shqipërisë, Bosnje dhe Hercegovinës, Kosovës dhe Serbisë për të çuar përpara integrimin e barazisë gjinore në të gjitha fazat e politikëbërjes dhe buxhetimit në nivel kombëtar dhe vendor. Prezantimi virtual i programit bëri bashkë përfaqësues të Sida-s dhe UN Women, pjesëmarrës të nivelit të lartë nga qeveritë kombëtare dhe vendore dhe shoqërinë civile nga vendet e Ballkanit Perëndimor, për të diskutuar mënyrën për të ecur përpara, me qëllim sigurimin e financimit dhe buxhetimit transformues për barazinë gjinore në rajon.

Programi do të synojë përforcimin e veprimeve dhe politikave e financave nga ana e qeverisë për të çuar përpara zbatimin e angazhimeve kombëtare dhe ndërkombëtare të Deklaratës së Pekinit dhe Platformës për Veprim dhe të Agjendës 2030 për Zhvillim të Qëndrueshëm nga Kombet e Bashkuara.

Anila Denaj, Ministre e Financave dhe Ekonomisë u shpreh rreth kësaj nisme të re se qeveria e ka padyshim në fokusin e saj ndaljen e pabarazive:

“Ne synojmë financa publike që ofrojnë shërbime të përmirësuara publike, duke u mundësuar grave dhe burrave të përfitojnë në mënyrë të barabartë, çka do të ndalë kështu pabarazitë dhe do t’i ri-adresojë ato.”

Buxhetimi i përgjithshëm gjinor në Shqipëri është i detyrueshëm me ligj për financat e qeverisë qendrore dhe vendore. Momentalisht janë 38 programe buxhetore që trajtojnë çështjet e barazisë gjinore në shëndetësi, mbrojtje sociale, arsim dhe bujqësi, ndërkohë që nisma e re ka si synim të rrisë edhe më tej shumën që alokohet për këto çështje.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.