Shqipëria, rivalja e re e Kroacisë – Mes 10 destinacioneve të preferuara për turistët francezë

“Shqipëria është pjesë e destinacioneve magjepse në zhvillim, së bashku me Kolumbinë dhe Haitin,” vë në dukje Jean-Francois Rial, kreu i udhëtimeve botërore “Voyageurs du monde”. Kështu nis artikullin për Shqipërinë francezja “Journal du Dimanche”, duke e renditur vendin tonë mes 10 destinacioneve turistike më të preferuara për turistët francezë.

I gjendur midis Malit të Zi dhe Greqisë, ky vend ballkanik po zgjohet nga një gjumë i gjatë izolues.

Shqipëria po hapet butësisht duke shpalosur hartën aventureske: majat alpine, luginat e gjelbëra, ligatinat me faunë të pasur dhe një vijë bregdetare prej 600 kilometrash, e kufizuar me ujërat kristal të Jonit dhe të Adriatikut.

“Ne eksplorojmë qytetet osmane të klasifikuara si trashëgimi botërore, si Berati me shtëpi të bardhë dhe me pafund dritare. Ose Gjirokastra, ku kalon nëpër rrugët me kalldrëm, pazarin e vjetër dhe kalanë që duket sikur kap qiellin.

Amfiteatri greko-romake qëndron mes bimësisë së dendur në Butrint.  Agjencia “Terres d’Aventures” ka vënë Shqipërinë në katalogun e saj, ku me një paketë 8 ditore mund të vizitohet me 1.150 euro. Rivalja e re e Kroacisë, “toka e shqiponjave”, është një tokat e fundit të panjohura të Mesdheut”, përfundon artikulli.

E.Z/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.