Sipërmarrësit e bimëve medicinale – Çuçi: Do të rritet aksesi i tyre në fondet e IPARD
Sipërmarrësit në sektorin e bimëve medicinale dhe aromatike do të kenë akses më të madh në fondet e Programit IPARD gjatë thirrjes së dytë të programit që pritet të hapet në muajt në vijim.
Këtë e ka bërë të ditur ministri i Bujqësisë dhe Zhvillimit Rural, gjatë një takimi me përfaqësuesit kryesorë të këtij biznesi, ndërsa ka deklaruar se ka marrë fund edhe ngërçi për lejet e ndërtimit të magazinave që iu duhen këtyre sipërmarrësve.
“Sektori i bimëve medicinale dhe aromatike mbetet në vëmendje të veçantë të politikave të Ministrisë së Bujqësisë dhe Zhvillimit Rural, pasi nga viti në vit niveli i eksporteve është rritur ndjeshëm dhe kjo përkthehet në më shumë të ardhura dhe vende pune për këtë industri. Vetëm gjatë vitit 2018 vlera e eksporteve përllogaritet në rreth 33 milionë euro.
Takimi me përfaqësuesit kryesorë të këtij biznesi na shërbeu për të diskutuar problematikat dhe për të adresuar zgjidhjet përkatëse. I dhamë fund ngërçit për lejet e ndërtimit të magazinave apo kapanoneve që iu duhen këtyre sipërmarrjeve. Po kështu do të rritet aksesi i tyre në fondet e Programit IPARD gjatë Thirrjes së Dytë që pritet të hapet në muajt e ardhshëm.”
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.