“S&P” ruan notën për Shqipërinë – Në B+/B, deeuroizimi mund të çojë në rritje të vlerësimit
Agjencia e vlerësimit të kreditit, Standard and Poor`s ka ruajtur të pandryshuar, në B+/B notën e borxhit sovran për vendin tonë, me perspektivë të qëndrueshme. Nota B+ është në terma afat-gjatë, ndërsa ajo B në terma afatshkurtër.
“Perspektiva e qëndrueshme balancon këndvështrimin tonë për vijimin e reformave në vend, në kuadër të kornizës institucionale, si dhe një rritje ekonomike të qëndrueshme dhe përmirësim të financave publike”, thuhet në njoftimin e Standard and Poor`s.
“Ne mund të rrisim notën për borxhin sovran të Shqipërisë në rast se, reformat strukturore, me fokus integrimin në Bashkimin Europian, do të shtriheshin në më shumë institucione dhe do të nxisnin perspektivën e rritjes ekonomike”, thuhet më tej.
Një veprim pozitiv do të vinte edhe në rast se, konsolidimi fiskal do të përmirësohej më tej sidomos sa i përket mbledhjes së të ardhurave.
Por, kësaj here, Standard and Poor`s bën edhe një “premtim” tjetër, duke thënë se deeuroizimi, apo më saktë ulja e përdorimit të euros në ekonomi, mund të çojë në një rritje të notës, që për rrjedhojë përkthehet në interesa më të ulta të huamarrjes për qeverinë shqiptare.
Nga ana tjetër ndërkohë, faktorët e zhvlerësimit lidhen me përkeqësimin e financave publike apo uljes së kreditimit të brendshëm për një kohë të tejzgjatur.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.