Strategji e re për prokurimet publike – Ndërhyrje për PPP-të dhe korrupsionin, 336 mijë euro për zbatimin
Këshilli i Ministrave ka miratuar strategjinë e re 4-vjeçare të procedurave tenderuese, e cila synon garantimin dhe mirëpërdorimin e fondeve publike. Sipas dokumentit të publikuar në Fletoren Zyrtare, strategjia 2020-2023 synon të garantojë një sistem prokurimi eficent dhe efektiv në përputhje me parimet e transparencës, konkurrencës së lirë dhe të ndershme, trajtimit të barabartë, etj. Ndërkohë që, ajo parashikon ndërhyrjen në 5 shtylla e më konkretisht: Prokurim publik eficient dhe i qëndrueshëm, përmirësimi i kuadrit ligjor dhe institucional për koncesionet dhe partneritetin publik-privat Riorganizimi i prokurimeve në fushën e mbrojtjes dhe të sigurisë, blerja e përqendruar dhe përmirësimi i sistemit të shqyrtimit të ankesave. Strategjia kërkon rishikimin e elgjislacionit të prokurimit publik, ndërkohë që tashmë një ligj i ri është depozituar në Kuvend për diskutim.
Në strategji i kushtohet rëndësi edhe koncesioneve dhe partneritetit publik-privat, ku pavarësisht ndryshimeve ligjore të bëra në vitin 2019, në kuadër të procesit “Screening” si dhe të negociatave të anëtarësimit, është e nevojshme që të kryhet një analizë e legjislacionit aktual për të identifikuar boshllëqet ligjore dhe për të përcaktuar pikat e ndërhyrjet që do të ndërmerren. Po ashtu, parashikohen masa për përmirësimin e rolit politik bërës të Agjencisë së Trajtimit të Koncesioneve si dhe rritje e kapaciteteve të autoriteteve kontraktore për të kuptuar më mirë se si dhe kur duhen përdorur koncesionet apo PPP për përmbushjen e nevojave të tyre.
Ndërhyrje kërkohen edhe në drejtim të korrupsionit në sistemin e prokurimit publik. Sipas APP-së, korrupsioni përbën një faktorët kryesorë të riskut për prokurimin publik i cili, përveç pasojave të tij demoralizuese, shkakton gjithashtu kosto shtesë, mos-efiçencë dhe shtrembërim të konkurrencës. Për këtë arsye, kërkohet hartimi dhe zbatimi i një Politike për Integritetin dhe Përgjegjshmërinë brenda autoriteteve kontraktore në përputhje me legjislacionin në fuqi. Kostoja për zbatimin e strategjisë është parashikuar në masën 336 mijë euro, shifër kjo që ka pësuar një ulje të ndjeshme në raport me kostot e planifikuara paraprakisht nga Agjencia e Prokurimit Publik, gjatë nxjerrjes së strategjisë për konsultim, ku kërkohej një shumë prej 476 mijë euro.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.