Tabaku: “Qeveria ka privatizuar Buxhetin e Shtetit, 83% e bizneseve të lëna jashtë nga ndihma”

Ish-deputetja dhe anëtarja e Kryesisë së Partisë Demokratike, Jorida Tabaku ka bërë një reagim të ashpër në lidhje me mënyrën se si qeveria po menaxhon krizën ekonomike të shkaktuar nga COVID-19.

Sipas Tabakut, paketat e shpallura nga qeveria nuk mjaftojnë për të trajtuar ngërçin ekonomik të mijëra punonjësve, ndërkohë që praktikat e qeverisë me koncensionet I cilëson korruptive:

“Edhe sot, në kulmin e pandemisë qeveria zien si një tenxhere korrupsioni dhe hajdutërie. Ekonomia jonë është e fundit në rajon, me borxhin më të lartë publik në rajon, me papunësi dhe varfëri të shtuar sepse financat janë në shërbim oligarkëve dhe jo të qytetarëve. Miliona euro për një grusht oligarkësh dhe gjysmë paketa me pikatore për njerëzit dhe ekonominë. Pa prekur milionat për PPP dhe koncesione e tendera”, shkruan ajo.

Ish-deputetja ka vazhduar më tej me akuzat duke u shprehur se Buxheti i Shtetit është privatizuar ‘nga një grup oligarkësh:

“Ne ditën kur shqiptarët kanë nevojë për mbështetjen e qeverisë, kur të ardhurat e buxhetit duhet tu vendosen në dispozicion, ata që përfitojnë janë po 10 personat e përhershëm. Klubi i Oligarkëve, ortakë me qeverinë, që privatizojnë kufij, bregdet, porte, rrugë, aeroporte, miniera, naftë e çdo pasuri kombëtare dhe që në 7 vjet kanë privatizuar buxhetin”, deklaron anëtarja e kryesisë së PD-së.

Edhe sa i takon të vetë punësuarve, znj. Tabaku thotë se, “nga 173 mijë të vetëpunësuar qeveria ka vendosur të kryejë pagesa për 30 mijë të tillë”. Ndërkohë nga ana tjetër, 83% e bizneseve nuk kanë më para as për të paguar punëtorët dhe furnitorët.

Tabaku e ka mbyllur denoncimin e saj, duke akuzuar qeverinë se nuk ka vision për të dalë nga situata dhe se deri më tani ka përdorur gjuhën e dhunës, duke vendosur gjoba për qytetarët, ‘ndërkohë që Pandemia Ekonomike po bën kërdinë’.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.