Takimi për emigrantët – Arrihet dakordësia, mbeten ende diferenca mes vendeve të BE

Liderët europianë arritën një marrëveshje për emigrantët ditën e Premte, pas bisedimeve të gjata, por qëndrojnë ende ndasi mes vendeve anëtare.  Nën marrëveshjen e arritur pas 9 orësh bisedime, liderët e Bashkimit Europian ranë dakord për të ndarë refugjatët që arrijnë në bllok vullnetarisht dhe të krijojnë qendra të kontrollit brenda unionit për të procesuar kërkesat për azil.  Ata ranë dakord gjithashtu për të ndarë përgjegjësinë për emigrantët që shpëtohen në det, që është një nga kërkesat kryesore të Kryeministrit të ri italian, Giuseppe Conte.

Ministri i Brendshëm në Itali, Matteo Salvini, lideri i partisë së djathtë Liga që ka premtuar ndalimin e emigrantëve nga Afrika dhe dëbimin e atyre që janë në Itali, e mirëpriti marrëveshjen dhe tha se Italia ka arritur 70% të gjërave që synonte.  Takimi në Bruksel vuri në dukje se si kriza e vitit 2015 e emigrantëve vazhdon të përndjekë Bashkimin Europian, pavarësisht rënies së mprehtë të njerëzve që i largohen vështirësive ekonomike në Lindjen e Mesme dhe Afrikë.  Marrëveshja u arrit në një atmosferë të krizës politike,  me kancelaren Merkel që u gjend në presion të madh politik, për të ashpërsuar qasjen ndaj refugjatëve.

Merkel u përpoq ti japë një ton pozitiv rezultatit, duke thënë se është diçka e mirë që liderët kanë rënë dakord për një qëndrim të përbashkët ndaj emigrantëve.  Megjithatë, ajo pranoi se vendet anëtare kanë ende shumë punë për të bërë që të zbehin diferencat. Presidenti francez, Emmanuel Macron, që ka kritikuar ashpër Italinë për dëbimin e anijes së emigrantëve, tha se bashkëpunimi europian ka mbizotëruar.

Në deklaratën përfundimtare, liderët ranë dakord për të kufizuar lëvizjet e emigrantëve brenda BE-së, por  bënë të qartë se të gjitha premtimet do të ndërmerren me bazë vullnetare nga vendet anëtare. Ata premtuan gjithashtu që të përforcojnë kufijtë e jashtëm dhe të rrisin financimin për Turqinë, Marokun dhe vendet e Afrikës Veriore që të parandalojnë emigrimin në Europë.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.