Tatimet në kulmin e aksionit – FMN, asistencë për përmirësimin e kontrolleve

Ndërsa administrata tatimore është në kulmin e aksionit, të përqendruar kryesisht në zonat turistike, sa i përket subjekteve informale, punonjësve të paregjistruar dhe deklarimit real të pagave, Fondi Monetar Ndërkombëtare do të japë asistencë të mëtejshme tatimore për të përmirësuar cilësinë e kontrolleve.  Lajmi është bërë me dije gjatë një takimi të zhvilluar midis zëvendësdrejtorit të Përgjithshëm të Tatimeve, Xhavit Çurri  dhe përfaqësuesve të misionit të Fondit Monetar Ndërkombëtar, të cilët ndodhen për një vizitë një javore në vendin tonë.

Ndërsa, sipas njoftimit për media të Drejtorisë së Përgjithshme të Tatimeve, një pikë tjetër e dhënies së asistencës nga FMN, do të jetë edhe rritja profesionale të burimeve njerëzore, duke bërë të mundur që kontrollet të jenë sa më korrekte dhe të shmanget korrupsioni. Nga ana e tij Zëvendësdrejtori Çurri, i njohu ekspertët me reformat që po ndërmerr administrata tatimore, me projektet kryesore që janë duke u zbatuar, siç është fiskalizimi, por edhe rritja e numrit të pagesave elektronike, si një mënyrë për të reduktuar kontaktet e tatimpaguesve me administratën tatimore, por edhe për të kursyer kohë e para.

Vetëm gjatë aksionit përgjatë sezonit turistik veror, administrata tatimore, ka përfshirë 2792 punonjës në skemën e kontributeve,  ka arkëtuar 40.8 milionë lekë detyrime të prapambetura nga si dhe ka formalizuar mbi 1531 subjekte.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.