Timmermans fiton në Holandë – Populistët, në vend të tretë. Lehtësim për partitë pro-Europës
Partia laburiste e komisionerit europian, Frans Timmermans, fitoi zgjedhjet në Holandë për Parlamentin Europian, duke mposhtur fare lehtë sfiduesin populist, që kishte mbizotëruar në sondazhe. Kandidati kryesor social demokrat për të drejtuar Komisionin Europian, Timmermans, e ngriti partinë e tij pro-Europës, duke fituar më shumë se 18% të votave. Partia nacionaliste e Thierry Baudet, që ka qenë kokë më kokë në sondazhe me konservatorët e Kryeministrit Mark Rutte, doli në vend të tretë me 11%. Votimi në Holandë solli provën e parë ndaj partive populiste që po garojnë në të gjithë Europën dhe rezultati ofron pak lehtësim për partitë tradicionale.
“Shoh kudo që ekziston nevoja e një Europe ndryshe, një Europë që është e gatshme të luftojë ndryshimin klimatik dhe të bashkëpunojë në fushën sociale. Një Europë që do ndalojë shmangien e taksave nga kompanitë e mëdha. Shpresoj që social demokratët të fitojnë mbështetje në shumë vende, në mënyrë që të ndërtojmë së bashku Europën,” tha Timmermans.
Partitë e djathta pritet të fuqizohen në Parlamentin Europian në zgjedhjet që përfundojnë më 26 Maj, por nuk parashikohet të fitojnë më shumë se 1/5-ën e vendeve. Nacionalisti, Thierry Baudet, me 11% të votave, tha se është i gëzuar me rezultatin pavarësisht se priste 15%. Ai ka vënë theksin te politikat “Holanda e para”, duke kufizuar emigrimin dhe nxjerrë Holandën nga Bashkimi Europian.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.