Transporti ajror – Edhe ky vit nis me rritje të udhëtarëve

Tregu i transportit ajror të individëve u rrit edhe për janarin. Sipas të dhënave të Instat, nga aeroporti i Tiranës udhëtuan 222 mijë pasagjerë, në rritje me 4% krahasuar me të njëjtën periudhë të një viti më parë. Tregu i pasagjerëve u rrit, pavarësisht se në muajin e parë të vitit numri i vizitorëve të huaj pësoi rënie. Pas shtatë vitesh radhazi në rritje, tregu duket se ka ende potenciale të mëdha, ndërkohë që tentativat për ndërtimin e aeroporteve të tjerë vazhdojnë. Këtë vit, pritet të nisë puna për rehabilitimin dhe kthimin në gjendje pune të aeroportit të Kukësit, përmes një marrëveshjeje të partneritetit publik-privat. Ndërkohë, qeveria ende po jep informacion për stadin ku ndodhen negociatat me investitorët turq që duan të ndërtojnë një aeroport pranë Vlorës.

Nga ana tjetër, transporti detar është një treg që edhe këtë vit paraqitet në rënie. Sipas Instat, ai u përdor nga 66 mijë pasagjerë gjatë janarit, afërsisht sa një e katërta e udhëtarëve që zgjodhën fluturimin.

Për sa i takon hekurudhave, gjatë janarit u regjistrua një rritje me afro 28%, por numri ngelet në vlera të papërfillshme, me vetëm 3 mijë udhëtarë.  Por, ndërkohë, hekurudha ngelet një alternativë e rëndësishme në transportin e mallrave. Volumi i transportit u rrit me 64% gjatë janarit, kryesisht në funksion të aktivitetit të industrisë minerare në vend.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.