Transporti ajror në Shqipëri kap podiumin në Europë – Rritja më e lartë e pasagjerëve për Qershorin

Ritmi i zgjerimit të transportit ajror në Shqipëri është në rritje të vazhdueshme, duke regjistruar edhe një normë prej 13.4% për gjysmën e parë të vitit. Pas një nisjeje të ngadaltë në fillim të vitit, kjo normë e rritjes është përshpejtuar me ardhjen e sezonit veror dhe duke kapur një shtim të udhëtarëve me 21% për muajin Qershor.

Sipas hartës së përpiluar nga Këshilli Ndërkombëtar i Aeroporteve, kjo rezultoi edhe norma e tretë më e lartë e rritjes për të gjithë Europës, pas Gjeorgjisë me 28.4% dhe Maqedonisë, të dhënat e të cilave nuk janë pasqyruar, por që tejkalojnë 27%.

Në përgjithësi Europa Lindore, Ballkani dhe Turqia kanë pasur edhe shtimin më të madh të pasagjerëve që fluturojnë me linja ajrore. Duke bërë një krahasim të ecurisë së këtij sektori në Ballkanin Perëndimor, me përjashtim të Serbisë, të gjitha vendet e tjera regjistruan rritje dyshifrore në përqindjen e pasagjerëve. Por ndryshe nga Shqipëria e Maqedonia, rritja nuk ka qëndruar konstante për pjesën tjetër të vendeve.

Mali i Zi, i cili kishte raportuar një shtim të ndjeshëm të pasagjerëve gjatë muajve të parë të vitit ka parë një ngadalësim për pjesën tjetër të vitit. Siç duket edhe nga grafiku i mëposhtëm, edhe Kosova ka mbajtur hapin e Shqipërisë e Maqedonisë, me përjashtim të një uljeje gjatë muajit Prill.

Për muajt në vijim, Korrik dhe Gusht, pritet që të dhënat e transportit ajror në vendin tonë të mbeten mbi 20% rritje, çka do ta çonte zgjerimin e Shqipërisë në krye të tabelës së Ballkanit dhe Europës.

Angelo Haruni/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.