Tregu ajror ra me 64%/ Situata nga COVID-19 për muajin mars, në prill rënia edhe më e thellë
Mbyllja e transportit ajror për shkak të situatës së krijuar nga COVID-19 ka sjellë një rënie të ndjeshme të fluksit të pasagjerëve gjatë muajit mars.
Sipas të dhënave të Autoritetit të Aviacionit Civil në mars numri i pasagjerëve që udhëtuan përmes aeroportit “Nënë Tereza” ra me 64%, krahasur me të njëjtën periudhë të një viti më parë.
Kjo rënie pritet të jetë edhe më e thellë gjatë muajit prill, për shkak se fluturimet kanë qenë të bllokuara gjatë gjithë muajit, ndërkohë që për marsin kompanitë ajrore operuan normalisht deri në datën 9 mars, kur edhe nisi ndalimi i fluturimve.
Fillimisht, vendi ynë ndaloi fluturimet me 12 destinacionet italiane, që gjithsesi mbizotërojnë tregun e fluturimeve në vend.
Gjatë marsit, numri total i pasagjerëve që udhëtuan pers aeroportit të Rinasit u fiksua në 76 106 pasagjerë, nga të cilët 369 janë pasagerjë të fluturimeve charter.
Përveç faktit se kjo shifër është shumë herë më e ulët, në raport me marsin e viti të kaluar, ajo është ndjeshëm më e ulët edhe në raport me muajin shkur të këtij viti, që konsiderohet i mbarë në drejtim të numrit të pasagjerëve.
Kjo pasi në shkurt, përmes aeroportit të Rinasit fluturuan 193 720 pasagjerë apo 10% më shumë në raport me shkurtin e vitit të kaluar.
Aktualisht të vetmet fluturime që po kryhen në Shqipëri janë ato të riatdhesimeve të shtetsave shqiptarë që mbetën jashtë vendit, pas mbylljes së kufijve.
Ndërkohë që, qeveria shqiptare nuk ka përcaktuar asnjë datë se kur transporti ajror mund të rinisë normalisht funksionimin.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.