Trump “bën histori” – Shkarkimi i tij do zyrtarizohet për herë të dytë, si asnjë president më parë, ndërsa FBI paralajmëron se do ketë sërish dhunë
Donald Trump po përballet me një shkarkim të dytë historik pasi Demokratët në Dhomën e Përfaqësuesve e akuzuan zyrtarisht atë për “nxitje të kryengritjes” për trazirat e Capitol Hill.
Pesë persona vdiqën në sulm javën e kaluar, duke përfshirë një oficer policie.
Të hënën, ligjvënësit miratuan një artikull që akuzon Trump për “krime të larta dhe kundërvajtje duke nxitur dhunë kundër qeverisë së Shteteve të Bashkuara” dhe duke shkelur kështu betimin e tij të zyrës.
Dhoma do të debatojë për akuzën të mërkurën. Kongresmeni demokrat David Cicilline nga Rhode Island, një nga demokratët që udhëheq përpjekjen, shkroi në Tëitter se partia kishte vota të mjaftueshme për ta kaluar atë dhe për të kërkuar shkarkimin e Trump për herë të dytë – një gjë që ndodh për herë të parë në historinë amerikane. Por që ai të hiqet nga detyra, Senati duhet ta miratojë vendimin me një shumicë.
Tani ka shenja se besnikët e Trump po planifikojnë të marshojnë përsëri në Kapitol, ditën e inaugurimit.
FBI ka arrestuar dhjetra pjesëmarrës në trazirat e javës së kaluar dhe vazhdon të qarkullojë postera të të dyshuarve, duke zbehur potencialisht pjesëmarrjen në një tjetër tubim.
Por me nëntë ditë deri në përurimin e Biden, zyrtarët po planifikojnë të sigurojnë zonën. Kryebashkiaku i Uashingtonit, Muriel Bowser, i kërkoi Departamentit të Sigurisë Kombëtare të vendoste kufizime të reja dhe u kërkoi njerëzve të shmangnin qytetin në 20 Janar.
Pentagoni, FBI, Shërbimi Sekret dhe agjenci të tjera thuhet se u vunë në gatishmëri dhe thanë se do të rriste trupat në Uashington në të paktën 10,000 deri të Shtunën.
D.B – SCAN
Burimi: The Guardian
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.