Trump kërkon mbështetjen e Fed – I bën thirrje që të mos rrisë normën e interesit këtë muaj
Presidenti Donald Trump tha se Rezerva Federale do të gabonte me rritjen e normave të interesit në javën e ardhshme, lëvizje që pritet gjerësisht, duke vazhduar kritikat ndaj bankës qendrore në SHBA.
Trump tha se ai kërkon fleksibilitetin e normave të ulëta të interesit për të mbështetur ekonominë amerikane, ndërkohë që po lufton mbi tregtinë kundër Kinës. “Duhet të kuptoni që jemi në luftë tregtare dhe po fitojmë. Por mua më nevojitet gjithashtu mbështetje”– tha ai.
Trump caktoi Jerome Powell në krye të sistemit bankar qendror, por gjatë kohëve të fundit ka shtuar kritikat drejt tij. Trump u tregua më i përmbajtur me komentet e tij për Powell, por kritikoi përsëri politikat e burrit që zgjodhi për vendin kryesor në Rezervën Federale. “Mendoj që është person i mirë dhe po bën më të mirën e tij. Megjithatë, nuk jam dakord me të pasi është shumë agresiv” – tha Trump.
Ndërsa pyetej për mundësinë e një recesioni kur të kandidojë në vitin 2020, Trump tha se ka faktorë të tjerë në botë që mund të ndikojnë ekonominë, përfshirë Brexit dhe trazirat në Francë. Trump po i referohej protestave kundër qeverisë në Francë, që kanë shënjestruar Emmanuel Macron.
Për Shtetet e Bashkuara, Trump tha se kompanitë po performojnë mirë dhe shtoi se nëse Rezerva Federale vepron në mënyrë racionale, atëherë nuk do të ketë recesion.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.