Udhëheqësit e Gjermanisë dhe Spanjës premtojnë një front të bashkuar për migracionin
Liderët e Gjermanisë dhe Spanjës gjatë një takimi në rajonin jugor të Andaluzisë, u shprehën për një qasje të përbashkët për emigracionin në Bashkimin Europian si rrjedhojë e rritjes së opozitës populiste në vendet e tjera të BE-së për të marrë më shumë azilkërkues.
Kancelarja gjermane Angela Merkel dhe kryeministri spanjoll Pedro Sanchez mbështetën një “shpërndarje të drejtë” të emigrantëve për në vendet e BE. Ata thanë se do të ndajnë vizionin e tyre të përbashkët në një samit të BE muajin e ardhshëm në Austri.
“Asnjë vend nuk mund të lirohet nga kjo sfidë. Tendenca raciste që po shohim, fatkeqësisht, në të gjitha vendet anëtare është diçka për të cilën duhet të luftojmë”. u shpreh Merkel në një konferencë për shtyp pas takimit.
Spanja është bërë destinacioni kryesor për emigrantët që përpiqen të arrijnë në Evropë nga deti në muajt e fundit. Qeveria socialiste e Sanchez po përpiqet të ndalë rrjedhën e emigrantëve në të gjithë Mesdheun duke biseduar me Marokun, një nga pikat kryesore të nisjes që përdoret tani nga trafikantët për të kaluar në det.
Si pjesë e kësaj përpjekjeje, Sanchez i kërkoi Merkel një bashkëpunim më të madh financiar nga BE për të ndihmuar Marokun dhe Tunizinë me programet e kontrollit të emigrantëve.
“Ne duhet ta intensifikojmë mbështetjen tonë për Marokun dhe Tunizinë. Ata janë shtete kufitare dhe kanë nevojë për ndihmën tonë”. tha Merkel
Organizata Ndërkombëtare për Migracionin thekson se pothuajse 24,000 refugjatë dhe emigrantë të tjerë kanë arritur në Spanjë gjatë këtij viti – diku afërsisht trefishi i vitit të kaluar. Të paktën 1,500 emigrantë të tjerë kanë vdekur deri më tani këtë vit në përpjekje për të kaluar Mesdheun.
Dy udhëheqësit e BE-së kishin rënë dakord më parë për një marrëveshje në të cilën Spanja do të marrë përsëri emigrantët tashmë të regjistruar atje, që përpiqen të hyjnë në Gjermani përmes Austrisë. Marrëveshja hyri në fuqi ditën e shtunë.
Merkel ka kërkuar marrëveshje bilaterale me Spanjën, Greqinë dhe Italinë për të ndaluar emigrimin e ashtuquajtur të mesëm në Gjermani. Negociatat me Greqinë dhe Italinë janë në vazhdim.
s.g/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.