“Varfërohet” komunikimi – Punësimi dhe pagat ranë në tremujorin IV 2018
Sektori i telekomunikacioneve duket se po kalon një periudhë të vështirë. Mbështetur në të dhënat e Institutit të Statistikave, vitin e kaluar grupi i shërbimeve që përfshin komunikacionet dhe informacionin pësoi rënie për tre tremujorë radhazi, duke vijuar ecurinë negative të nisur qysh në tremujorin e fundit të vitit 2017. Të tjerë tregues të tërthortë dëshmojnë se ecuria nuk ka qenë shumë e mirë as në tremujorin e katërt.
Gjithnjë sipas Instat, ky segment ishte i vetmi ndër aktivitetet e shërbimeve që pësoi rënie të punësimit dhe pagave në tremujorin e katërt 2018. Mbështetur në anketimin e Instat, indeksi i numrit të të punësuarve pësoi rënie me 3.5% krahasuar me të njëjtën periudhë të vitit 2017, ndërsa indeksi i fondit të pagave ra akoma më thellë, me 7.9%.
Tregu i telekomunikacioneve në vitet e fundit po vuan rënie të të ardhurave dhe fitimeve. Sipas të dhënave nga Autoriteti i Komunikimeve Elektronike dhe Postare (AKEP), për vitin 2017 tre operatorët më të mëdhenj të tregut humbën së bashku rreth 7.6 miliardë lekë ose rreth 59 milionë euro. Arsyet kryesore që e kanë kthyer këtë biznes me humbje për dy vitet e fundit janë konkurrenca e ashpër, rënia e të ardhurave nga shërbimet me shumicë dhe nevoja e vazhdueshme për investime.
Kjo ecuri duket se ka ulur interesin e investitorëve rreth këtij tregu. Në fund të vitit 2017, operatori Plus u tërhoq nga tregu, ndërsa grupi grek OTE nxori në shitje kompaninë Telekom Albania, shitje që pritet të finalizohet gjatë këtij viti.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.