Viti i përfundimit të stimujve – Nowotny: BQE do të ndalojë nëse ekonomia vazhdon e fortë

Banka Qendrore Europiane mund të përfundojë stimujt monetarë këtë vit, nëse ekonomia e Eurozonës vazhdon të rritet me hapa të fortë.

Komentet vijnë nga anëtari i bordit drejtues të bankës në Frankfurt, Ewald Nowotny.

Institucioni ka deklaruar se do të blejë tituj borxhi nga qeveritë dhe kompanitë e Eurozonës deri në muajin Shtator të këtij viti dhe pritet gjerësisht që të përfundojë këtë skemë që arrin vlerën e 2.55 trilionë euro.

Qëllimi i kësaj skeme është rritja e nivelit të çmimeve në zonën e valutës së përbashkët, si dhe mbështetja e ekonomisë me stimuj monetarë.

Komentet e Nowotny janë të ngjashme me ato të anëtarin tjetër të bordit drejtues, Benoit Coeure,  dhe pritet që të forcojnë pritshmëritë e publikut.

“Nëse ekonomia vazhdon me këtë performancë, ne mund të lejojmë që programi të përfundojë në 2018-ën”, tha Nowotny.

Stimujt monetarë të Bankës Qendrore Europiane kanë ndihmuar Eurozonën që të dalë nga rreziku i deflacionit, ndërkohë që rritja e çmimeve qëndron tashmë sipër 1%-shit.

Nowotny tha se politikëbërësit do të jenë fleksibël, edhe nëse norma e inflacionit nuk e arrin objektivin e BQE në afër 2% për vitet në vazhdim.

“Nuk është e thjeshtë të shpjegosh se pse 1.5% nuk është mjaftueshëm dhe 1.9% është perfekte”, tha Nowotny në lidhje me objektivin e inflacionit.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.