Zgjidhja me ndërmjetësim, ndryshimet në ligj do të lehtësojnë punën në gjykata

Vite të tëra në shqyrtimin e mosmarrëveshjeve të ndryshme, të cilat mund të zgjidhen me një procedurë më të thjeshtë, kanë mbingarkuar sistemin gjyqësor.

Për ti ardhur në ndihmë qytetarëve, por edhe lehtësimin e sistemit gjyqësor është parë e nevojshme ndryshimi i ligjit “Për Ndërmjetësimin dhe zgjidhjen e mosmarrëveshjeve”.

Ndryshimet e këtij drafti pritet të jenë shumë efektive dhe konkrete, kur në shumë raste “ndërmjetësimi” do të bëhet i detyrueshëm përpara sesa të shkohet në gjykatë. Ky draft tashmë është future për shqyrtim në procedurat parlamentare.

Sipas relacionit që e shoqëron “mosmarrëveshjet me karakter pasuror, që lidhen me të drejtat e pronësisë ose të bashkëpronësisë, pjesëtimin e pasurisë, paditë për kërkimin e sendit, mosmarrëveshjet që rrjedhin nga mospërmbushjet e detyrimeve kontraktore, si dhe ato që kanë si objekt shpërblimin e dëmit jashtë kontraktor me vlerë nën një milion lekë”, janë  çështje  që rekomandohet të zgjidhen me ndërmjetësim, dhe pa vajtur fare në gjykatë. Edhe pse ka vite që ndërmjetësimi  funksionon në vendin tonë, përsëri  është pak I njohur  duke bërë  që të mos kishte  efektin e duhur. “Gjykatat nuk kanë qenë aktive në thirrjen e ndërmjetësve”, thuhet në relacion, ndërkohë që propozohet forcimi i strukturave dhe i mënyrës së veprimtarisë.

Kështu parashikohet  pavarësia e Komisionit të Licencimit të Ndërmjetësve. Një tjetër risi që sjell projektligji është edhe specializimi i ndërmjetësve në fushat tregtare dhe në atë të drejtësisë për të mitur.

Gjithashtu do të zgjerohet rrethi i konflikteve që mund të zgjidhen me ndërmjetësim. Kështu ai do të mund të zbatohet për: çështjet me natyrë administrative që lidhen me shpërblimin e dëmit të ardhur si rezultat i zbatimit të akteve dhe vendimeve administrative, si dhe për zgjidhjen e pasojave që mund të vijnë për një palë, individ apo person juridik nga procesi i anulimit ose i shfuqizimit të tyre.

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.