1 milionë euro për strehimin në Tiranë/ Rritet ndjeshëm fondi, do të akomodohen të prekurit nga tërmeti!
Bashkia e Tiranës ka rritur ndjeshëm fondin për strehimin në kryeqytet, për vitin 2020, për t’iu përgjigjur nevojave të qytetarëve të cilët kanë pasur dëmtime në shtëpitë e tyre apo kanë mbetur pa banesa për shkak të tërmetit me përmasa katastrofike të 26 Nëntorit. Kështu, në buxhetin e bashkisë, detajohet se bonusi i strehimit është një nga zërat që zë peshën më të madhe buxhetore programin e politikave sociale, për shkak të shpalljes së gjendjes së jashtëzakonshme.
Konkretisht buxheti për vitin 2019 afro 84 milionë lekë apo 688 mijë euro, ndërsa për vitin 2020 është parashikuar në 132 milionë lekë, apo rreth 1 milionë euro. Po ashtu, rritje ka pësuar edhe zëri i fondit rezervë, me 30 milionë lekë, ku për 2020-ën janë akorduar 150 milionë lekë apo 1.2 milionë euro, si dhe fond i kontigjencës është dyfishuar nga 20 milionë në 40 milionë lekë, apo rreth 320 mijë euro, me qëllim që t’iu përgjigjet situatave të paparashikueshme që mund të ndodhin gjatë vitit të ardhshëm. Tërmeti i 26 nëntorit ka shkaktuar dëme të mëdha materiale në Tiranë, ku deri më tani bashkia ka trajtuar me bonus strehimi mbi 2 mijë familje dhe është ende në proces vlerësimi për qytetarë të tjerë të cilët i kanë shtëpitë e pabanueshme.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.