40 mijë lekëshi, aplikojnë më pak se gjysma – Në një javë janë paguar afro 61 mijë punonjës
Kur ka kaluar një javë nga hapja e aplikimeve për pagën e vënë në dispozicion nga qeveria prej 40 mijë lekësh për bizneset e prekura nga COVID-19, kanë aplikuar më pak se gjysma e punonjësve që janë parashikuar të përfitojnë. Sipas të dhënave të Drejtorisë së Tatimeve, nga 176 mijë punonjës që duhet të jenë përfitues, deri më tani kanë aplikuar 87.722 të punësuar, në 28.544 biznese.
Tatimet bëjnë me dije se deri më tani janë paguar 60,925 punonjës, me një vlerë prej afro 2.4 miliardë lekësh. Ndërsa në proces verifikimi janë kërkesat e 1388 bizneseve, të cilët përfshijnë 11.428 punonjës. Nga ana tjetër, në një javë janë refuzuar kërkesat e depozituara nga 55 biznese të cilat kanë të regjistruar 371 punonjës.
Sa i takon kategorive të subjekteve tatimet bëjnë me dije se numri më i lartë i kërkesave është bërë nga të vetëpunësuar me punëmarrës në rreth 10,415; më pas renditen të vetëpunësuar (të vetëm) me 8,791 kërkesa; Punëdhënës me 8,197 kërkesa, ndërsa më pak aplikime regjistrojnë të vetëpunësuarit pa punëmarrës dhe punonjës të papaguar të familjes.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.