70 mijë punonjës marrin 40 mijë lekët – Shpërndahen 2.8 miliardë lekë, mbi 11 mijë kërkesa në proces
Afro 70 mijë punonjës kanë marrë pagën prej 40 mijë lekësh të ofruar nga qeveria në kuadër të masave të marra ndaj COVID-19. Sipas të dhënave zyrtare të Drejtorisë së Përgjithshme të Tatimeve, është bërë pagesa për 30,918 biznese, me një vlerë totale prej 2.8 miliardë lekësh. Ndërsa janë miratuar kërkesat për 80.011 punonjës.
Tatimet bëjnë me dije se kërkesat e 11,511 të punësuarve që presupozohet të përfitojnë nga mbështetja financiare e qeverisë janë ende në process verifikimi, ndërkaq 560 janë refuzuar për shkak se nuk kanë plotësuar të dhënat e tyre në mënyrë korrekte apo nuk plotësojnë kushtet. Nga kjo paketë përfitojnë subjektet me të ardhura vjetore mbi 14 milionë lekë, që kanë mbyllur aktivitetet me urdhër të Ministrisë së Shëndetësisë; ish-punësuarit në subjektet që janë lejuar të kryejnë aktivitetet, të cilët janë larguar nga puna nga data e hyrjes në fuqi të këtyre urdhrave deri në datën 10 prill 2020; të punësuarit në subjektet me të ardhura vjetore deri në 14 milionë lekë, që janë lejuar të kryejnë aktivitete dhe kanë qenë në punë deri në datën e hyrjes në fuqi të urdhrave të ministrit të Shëndetësisë.
Përfitues do të jenë edhe punonjësit e subjekteve, persona fizikë ose juridikë, që ushtrojnë aktivitetin si struktura akomoduese, të cilët figurojnë në listë pagesa deri në datën e urdhrave të ministrit të Shëndetësisë dhe Mbrojtjes Sociale. Sa i takon paketës financiare 1, mesdita e datës 29 Prill ishte afati i fundit për dorëzimin e ankesave të subjekteve dhe individëve që kanë pakënaqësi apo nuk kanë përfituar.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.