Adriatik Llalla në Turqi – Komisioneri: T’i nënshtrohet Vetting-ut, dorëheqja e pavlefshme

Kolegji i Posaçëm i Apelimit do të vendosë më datë 6 qershor nëse ish Kryeprokurori Adriatik Llalla  do t’i nënshtrohet apo jo Vetting-ut. Përmes një seance që zgjati rreth 3 orë, Trupa Gjykuese e Kolegjit dëgjoi pretendimet Komisionerit Publik që kërkon vijimin e Vetting-ut ndaj Llallës dhe përfaqësuesit ligjor të këtij të fundit, Sokol Hazizaj. Procesi i gjykimit ishte ndërprerë më parë, për t’i dhënë kohë Hazizajt të merrte një prokurë të plotë përfaqësimi nga Llalla. Avokati paraqiti në Komision prokurën e dërguar nga Adriatik Llalla nga Turqia më datë 28 qershor. Trupa gjykuese verifikoi se prokura ishte lëshuar konform rregullave nga një zyrë noteriale turke.

Rikthimi i Adriatik Llallës në procesin e Vetting-ut është kërkuar nga Komisioneri Publik, një prej tre organeve të Vetting-ut.  Procesi i rivlerësimit të Llallës u ndërpre nga Komisioni i Pavarur i Kualifikimit,  pasi ai dha dorëheqjen si magjistrat. Por sipas Komisionerit Publik Florian Ballhysa vendimi për ndërprerjen e Vetting-ut ndaj Llallës është i pabazuar në ligj, pasi ai ende gëzon statusin e Magjistratit.

Ballhysa argumentoi para trupit gjykues se Llalla i ka paraqitur më 12 shkurt 2008 Presidentit të Republikës, shkak për të cilin i është ndërprerë edhe Vetting-u, por se kjo nuk ka fuqi ligjorë pasi dorëheqja duhet të ishte paraqitur përpara Këshillit të Lartë të Drejtësisë.  Komisioneri publik akuzoi kolegët e Komisionit të Pavarur të Apelimit se nuk kanë ndjekur hapat e duhur për te verifikuar dhe hetuar dorëheqjen e Llallës. Sipas tij, Llalla rezulton se nuk e ka humbur për asnjë çast statusin e magjistratit prokuror qe nuk i është hequr as kur ishte kreu i ILDKPI.

Avokati i Llallës, Sokol Hazizaj e konsideroi të pabazë pretendimin e Komisionerit për pavlefshmërinë e dorëheqjes së ish Kryeprokurorit. Sipas tij dorëheqja është një veprim individual njerëzor të cilin nuk ka pse e miraton një institucion. Kushtetuesja garantin te drejtën për dorëheqje, pa e kushtëzuar te vullneti i një institucioni, tha Sokol Hazizaj.

Lidhur me këtë pikë kreu i Trupit Gjykues Sokol Çomo vërejti se dorëheqja është dërguar në Presidencë nga Llalla të shtunën më 12 shkurt, ditë pushimi për administratën publike.

Lorenc Rabeta/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.